Олунньу 14 күнүгэр И.Г. Тимофеев аатынан Майа лиссиэйин үөрэнээччилэрэ ытыктабыллаах ыалдьыты, буоксаҕа Россия уонна Европа многократнай чемпионун, Аан дойду чемпионатын призёрун, Олимпийскай оонньуулар кыттыылааҕын, Мэҥэ Хаҥалас улууһун ытык киһитин Василий Михайлович Егоровы кытары истиҥ кэпсэтиигэ түмүлүннүлэр. Бу дьоһуннаах тэрээһини лиссиэй дириэктэрэ Татьяна Спартаковна Попова сүрүннээн, үрдүк таһымнаахтык тэрийэн ыытта.
Көрсүһүү кыттааччыларга барыларыгар умнуллубат үөрүү түгэнэ буолла. Василий Егоров спорка бэйэтин суолун, тус олоҕун, дьиэ кэргэнин туһунан оҕолорго сиһилии кэпсээтэ. Чөл олоҕу тутуһууга, булгуччулаах дьиссипилиинэлээх буолууга уонна спордунан өрүү дьарыктаныыга болҕомтону ууран, үөрэнээччилэр араас ыйытыыларыгар толору хоруйдаата.
Спортсмен хас биирдии киһи олоҕор сөптөөх сыал-сорук туруоруутун, ону ситиһии суолларын уонна доруобуйаны харыстааһын сүдү суолтатыгар ураты болҕомтотун уурда. Кэпсэтии сылаас, истиҥ эйгэҕэ буолан, тыыннаах алтыһыы көҕүлээтэ. Үөрэнээччилэр Василий Михайловичка истиҥ интэриэстэрин көрдөрөн, элбэх ыйытыыны биэрдилэр уонна кини сыаналаах сүбэлэрин, үөрэтиилэрин иһин барҕа махталларын биллэрдилэр.
Бу кэрэхсэбиллээх көрсүһүү оҕолорго үөрэххэ-билиигэ, спорка саҥа үрдэллэри дабайарга уонна инники олохторугар ситиһиигэ кынаттыыр күүстээх өйөбүл, ыйар суолдьут сулус буолуоҕа диэн бигэ эрэллээхпит.
Диана Пинигина, X кылаас,
И.Г. Тимофеев аатынан Майа лиссиэйэ.
keskil14.ru