Олунньу 5 күнүгэр гимназиябытыгар өрөспүүбүлүкэтээҕи “MatInFest” бэстибээл иһинэн Спидкубинг чемпионата буолла. Бу тэрээһин гимназиябыт общетехническай кафедратын учууталларын көҕүлээһиннэринэн ыытыллар. Быйыл Спидкубинг чемпионата 7-с төгүлүн буолла.
Саха Өрөспүүбүлүкэтин бастакы бэрэсидьиэнэ М.Е. Николаев оскуолаларын ситимигэр киирэр оскуолалартан 8 хамаанда кэлэн кыттыыны ылла.
Саина Захарова, Афоня Местников видеолара
Кыттааччылар биирдиилээн уонна хамаанданан күрэхтэстилэр. Кубик араас көрүҥүн хомуйдулар. Элбэх оҕо бу көрүҥүнэн дьарыктанар эбит. Ону билэн олус үөрдүм, тоҕо диэтэххэ, головоломканы кэрэхсиир оҕолор киэҥ билиилээх-көрүүлээх буолан улаатыахтара диэн эрэнэбин.
Мээнэ киһи кубигы хомуйбат. Комбинациялары уонна ньымалары билиэххэ наада. Ону барытын наар өйдүү сылдьар олус ыарахан, киһиэхэ барытыгар бэриллибэт дьоҕур.
Түмүккэ хас биирдии көрүҥҥэ кыайыылаахтары быһаардылар. Кыайыылаах үрдүк аатын сүкпүт оҕолорго өйдөбүнньүк бириистэри, грамоталары, мэтээллэри туттардылар.
Кыайыылаах оҕолору истиҥник эҕэрдэлиибин. Спидкубинг көрүҥэ сайда, дьон интэриэһин тарда турарыгар баҕарабын.
Чемпионат түгэннэриттэн Полина Пинигина хаартыскаларын бу сигэнэн киирэн көрүҥ https://vk.com/album-217282117_308875850
Катя МОНАСТЫРЕВА, «Тумус кыһа» медиа-киин,
С.К. Макаров аатынан Чурапчы гимназията
Видео Саина Захарова, Афоня Местников
Полина Пинигина хаартыскалара