Итинник диэн ааттаах регионнааҕы семинар-практикуму кылаас салайааччыларыгар анаан Таатта улууһун Өксөкүлээх Өлөксөй аатынан оскуола тэрийэн ыытта.
Кыттыгас бырайыакпыт көдьүүстээх
Бу семинары Уус Алдан улууһун Мүрү орто оскуолатын учуутала Мария Андреевна Аммосовалыын «Аһаҕас үөрэхтээһин: үөрэх-иитии эйгэтэ. Бииргэ үлэлээһин. Инники тосхоллор» диэн бырайыакпыт чэрчитинэн ыыттыбыт.
Бу бырайыакпыт чэрчитинэн былырыын Мария Андреевна улууска бастакынан алын кылаас оҕолоругар аналлаах английскай тыл олимпиадатын биһиги оскуолабыт базатыгар үрдүк таһымҥа ыыппыта. Оттон быйыл V-VIII кылаас үөрэнээччилэрин ортолоругар саха тылын олимпиадата тэрилиннэ.Оттон бу «Социальнай педагог айар-тутар мэтириэтэ» семинар-практикум бырайыак автора Оксана Архиповна Атласова, Мүрү орто оскуолатын үрдүк категориялаах социальнай педагога, СӨ үөрэҕириитин туйгуна. Тэрээһиммит республикаҕа буола турар Психология ыйын кэмигэр сөп түбэстэ. Бэйэм санаабар, биһиги бу бырайыакпыт көдьүүстээх, үөрэх, иитии эйгэтигэр улахан хамсатар күүс быһыытынан киирдэ.
Попова Татьяна Львовна, СӨ үөрэҕириитин туйгуна,
СҮ үөрэҕириитин Гранын хаһаайына,
педагог- организатор, “Кэскил” оҕо тэрилтэтин салайааччыта.
«Кулуһун» пост эдкордара интервью ыллылар
Васильева Варвара Лукична, дириэктэри үөрэх-методика үлэтигэр солбуйааччы:
- Уус Алдан Мүрү маҥнайгы нүөмэрдээх орто оскуолатыттан кэллибит. Оскуолабытыгар 700 оҕо үөрэнэр. Улуус саамай улахан оскуолата. “Мүрү эрэллэрэ”, “Мүрү старт” оҕо тэрилтэлэрэ, бэйэни салайыныы түмсүүтэ (оскуола самоуправлениета), президент сэбиэтэ бааллар. Бу семинарга социальнай педагогпут, медицинскэй үлэһиппит, логопедпыт бэйэлэрин үлэлэрин уопутун билиһиннэрэ кэллилэр. Оскуолаларын бырайыактарын кэпсииллэр, учууталлар бэйэлэрин идиэйэлэрин, оҥоһуктарын көрдөрөллөр. Оҕолорго үөрэххэ ситиһиилэри, эппиэтинэстээх буоларгытыгар баҕарабын.
Пухова Мария Ильична, Мүрү оскуолатын история, обществознание учуутала:
- Оскуолабыт Гаврил Васильевич Егоров аатын сүгэр. Араас хайысхалаах куруһуоктар үлэлииллэр. Ол курдук, самоупровление, үҥкүү, ырыа, оскуола хора, о.д.а. Оҕолорбун дебакка кытыннараары илдьэ кэллим. Ситимнээх саҥаны сайыннарар дьыалабыай оонньуубун билиһиннэрэбин.
Кэпсэттилэр: Арсен Матвеев, Вика Попова, VI кылаас үөрэнээччилэрэ.
Психологическай сулууспа туһалаах
Оксана Архиповна Атласова, бырайыак автора:
- Төрөппүттэргэ релаксионнай дьарыгы ыыттым. Оҕолорго ритмическэй эрчиллиилэри оҥортордум. ОВЗ-лаах оҕолорго сүрүн болҕомтобутун уурабыт. Александра Егоровна Ущницкая Уус Алдаҥҥа бастакынан психологическай сулууспаны киллэрбитэ. 1999 c. психологическай сулууспа тэриллибитэ. Медик, валеолог, логопед штаттардаахпыт. Оҕо ис-тас эйгэтин кытта үлэлээһиҥҥэ барытын кылаас салайааччыта кыайбат, онон анал специалист сүбэтэ улахан наадалаах. Оҕо социализация барыытыгар психологическай сулууспа саамай улахан көмөлөөх.
Кэпсэттэ: Тамара Ивановна Татаринова