«Сосновый бор» кииҥҥэ «Мы – будущее России» доруобуйаны бөҕөргөтөр, чэбдигирдэр симиэнэ олус интэриэһинэйдик, туһалаахтык буола турар”, – диэн Россия үөрэнээччилэрин бүттүүн хамсааһынын Саха сиринээҕи салаатын координатора Нюргуяна Владимировна Макарова кэпсиир.
– Ол курдук, үөрэнээччилэр хамсааһыннарын, өрөспүүбүлүкэ Оҕолорун Сүбэтин көхтөөх кыргыттара Лиана Попова, Карина Николаева, Милена Афанасьева, Аина Чугунова, Амелия Скрябина, Сандара Никитина Россия үөрэнээччилэрин бүттүүн хамсааһынын күнүн тэрийэн ыыттылар. Оонньуу иннинэ Оҕо Сүбэтин сүрүн тосхоллорун, сыалын-соругун, үлэтин-хамнаһын сырдаппыттара.
Биэс хамаандаҕа арахсан, ыстаансыйаларынан оонньообуттара, бэйэ-бэйэлэрин кытта үчүгэйдик, чугастык билсибиттэрэ. Учууталлар, баһаатайдар экспертаабыттара. Оонньуулар бары оҕону биир хамаандаҕа түмэр, санааларын аһаҕастык сайа этэр, Россия үөрэнээччилэрин бүттүүн хамсааһынын ырыатын, флешмоб-үҥкүүтүн үөрэтэр сыаллаах тэриллибиттэрэ. Бэйэлэрин көрүүлэрин үллэстэн, бүтэһигэр бырайыактарын эмблематын оҥорон таһаарбыттара. Кыайыылаах бастакы хамаанда үөрэнээччилэр хамсааһыннара логотиптаах футболкалары тутан, үөрүү-көтүү көтөллөммүттэрэ. Бары кыттааччылар логотиптаах уу иһэр бытыылка, блокнот, брелок тутан астыммыттара.
Хас биирдии оҕо Россия үөрэнээччилэрин бүттүүн хамсааһынын сүрүн бырайыактарын кытта билсиспиттэрэ, РДШ.РФ. саайтка суруттарарга сорудах ылбыттара.
«Медиавызов» симиэнэ эһигини күүтэр
Олунньу 18-ттан кулун тутар 3 күнүгэр диэри «Сосновый бор» оҕо сынньанар, чэбдигирэр киинигэр Россия үөрэнээччилэрин бүттүүн хамсааһынын Саха сиринээҕи салаата «Медиавызов» диэн медийнай анал хайысхалаах симиэнэҕэ ыҥырар. Оҕолор тэрээһиннэрэ интэриэһинэй, үрдүк таһымнаах буоллун диэн, симиэнэни «Юные якутяне» өрөспүүбүлүкэтээҕи ресурснай киин, Н.Е. Мординов-Амма Аччыгыйа аатынан «Кэскил» оҕо бэчээтин кыһата, М.К. Аммосов аатынан Хотугулуу-илиҥҥи федеральнай университет Хотугулуу-Илиҥҥи норуоттар тылларын уонна култуураларын института тэрийсэн ыытыахтара.
Иһитиннэрэр-медийнай, байыаннай-патриотическай хайысхалары сайыннарар, оҕо көхтөөх буоларыгар, тус сайдар суолларын тобуларыгар көмөлөһөр сыаллаах олус интэриэһинэй, чаҕылхай тэрээһиннэр, көрсүһүүлэр буолуохтара.
Оҕо Сүбэтин түмсүүтүгэр кыттан, араас интэриэһинэй куурустарга сылдьан, Россия үөрэнээччилэрин бүттүүн хамсааһынын хайысхаларыгар үөрэнэн, элбэх саҥа доҕоттордонон бэртээхэй умнуллубат күннэри атаарыаххыт.
Мария Иванова