Хас күн ахсын биһиги юнкордарбыт“Цифровое поколение” симиэнэ култуурнай тэрээһиннэрин көхтөөхтүк сырдаталларын көрөр буолуохтааххыт. Бу да сырыыга “Cover Inspiration” диэн араас ырыаларга кавер күрэҕэ буолбутун маннык сэһэргээтилэр:
Оҕолоор, биһиги баһаатайдарбыт сүрдээх талааннаахтарын номнуо бары билэҕит дии? Бу да түгэҥҥэ биһиги кэтэспиппит курдук барыта үрдүк таһымҥа ааста. «Cover Inspiration» күрэххэ маҥнай баһаатайдарбыт бэйэлэрэ эҕэрдэ нүөмэрдэриттэн саҕалаабыттара, ол кэннэ академиялартан оҕолор ыллаан, муусука араас инструменнарыгар оонньоон бииртэн биир сүрдээх кэрэхсэбиллээх нүөмэрдэри көрдөрбүттэрэ. Өнньүөс 10-с кылааһын үөрэнээччитэ Альберт Пахомов күрэх туһунан санаата:
“Мин Семен Абрамов ырыаларын сөбүлээн истэбин, ол иһин киһи дууһатын таарыйар “Кэлиий” уонна “Сахсырҕа” диэн ырыаларын ыллыырга санаммытым. Олус түргэнник бэлэмнэммитим уонна долгуйдум, ону таһынан билигин күөмэйим ыалдьа сылдьар буолан баҕарбытым курдук үрдүк таһымҥа ыллаабатым. Ол эрэн кавер күрэҕэ олус үчүгэйдик ааста, ордук үһүс академиялар нүөмэрдэрин сөбүлүү көрдүм, үчүгэйдик да ыллаатылар уонна элбэх мусуука инструменнарыгар оонньуур оҕолор бааллар эбит”.
Иккис этэрээт баһаатайа Ян Березкин “Кария глаза” диэн ырыаны олус үчүгэйдик толорбута, биһиги киниттэн хас күн тэрээһиннэргэ бэлэмнэллэрин ыйыталастыбыт:
“Биһиги оҕолорбутугар умнуллубат түгэннэри бэлэхтиир туһуттан, эрдэттэн бэлэмнэнэбит. Сатаабаппытын да сатыыр буолабыт. Оҕолорбут үөрэллэриттэн, дуоһуйа сынньалларыттан олус үөрэбит. Бу күрэхпит олус истиҥник ааста, мин ордук үһүс академиялар кыттыыларын сэҥээрэ көрдүм”.
Оҕолоор, эһиги эмиэ буолбут араас култуурнай тэрээһиннэрбитин биһиги оҥорбут кылгас роликтарбытын, сюжеттарбытын Кэскил саайдыгар, ютуб ханаалыгар көрүөххүтүн сөп.
Владиан Цыпандин, Хаптаҕай орто оскуолатын
10-с кылааһын үөрэнээччитэ,
Аркадий Арбыкин Бүлүүтээҕи
гимназия 10-с кылааһын үөрэнээччитэ