Сонун күрэскэ кыайдым

Билиҥҥи кэмҥэ, улахан киһини таһынан, оҕо эмиэ харчыны сатаан ааҕа, суоттуу үөрэниэхтээх, харчыны үлэлээн ыларын билиэхтээх дии саныыбын. Манна туһаайан оскуола үөрэнээччилэригэр финансовай үөрэхтэри ыыталлар.
Алтынньы 11 күнүгэр биһиги оскуолабытыгар «Бастыҥ бизнес-бырайыак-2024» диэн сонун күрэхтэһии буолан ааста. Уопсайа 12 оҕо кытынна. Бары олус наадалаах, интэриэһинэй бырайыактаах этибит. Кыттааччылар сэрэбиэй түмүгүнэн, уочаратынан тахсан экспердэр уонна көрөөччүлэр иннилэригэр кэпсээтибит.

Сорохтор хайыы-үйэ бырайыактарын үлэлэтэ сылдьаллар эбит. Ол курдук кекс астааччылар, араас киэргэли оҥорооччулар, таҥас тигээччилэр, велосипед өрөмүөннээччилэр, эргэ хаартысканы сөргүтээччилэр, сахарнай вата оҥорон атыылааччылар бааллар.

Мин «Дубайскай сакалааты атыыга уонна сакааһынан оҥоруу» диэн бырайыагынан кытынным. Хас да күн устата тугунан дьарыктаныахпын толкуйдаан баран презентация оҥорбутум уонна ону барытынс аас сааһынан суруйан, дакылаат бэлэмнээбитим. Бизнес-бырайыак хайдах оҥоһулларын билбэт буоламмын ыарырҕаппытым. Онтон интэриниэт ситимин көрөн, үөрэтэн туох хайдах буолуохтааҕын билэн оҥорбутум. Бырайыакпын этэҥҥэ көмүскээн, дьүүллүүр сүбэ быһаарыытынан кыайыылаах тахсыбытым уонна оскуола салалтата туруорбут 5000 солк. бириэмийэнэн наҕараадаламмытым. Бу харчыны дьыалабын саҕалыырбар диэн анаан туттарбыттара.

Бастакы миэстэни ылан улахан көмө туппуппуттан олус үөрэбин.

Иккис миэстэни ылбыт 10 кылаас үөрэнээччитэ Сайыына Сидорова эргэ таҥастары саҥа тыыннаан тигэрин туһунан бырайыактаах этэ. 5-6 кылаас үөрэнээччилэрэ «Сахалыы харысхалы оҥоруу» диэн бырайыактаах кыттан, үһүс миэстэ буолбуттара. Онтон атын оҕолорго учууталлар сөбүлээбит бырайыактарыгар харчынан анал бириэмийэ туттарбыттара.

Инникитин бырайыакпын олоххо киллэрэн, 1-1,5 ыйынан хайыы-үйэ атыылыы сылдьарбын долгуйа күүтэбин. Барыта табыллыа диэн эрэнэбин.

Алёна ТАППЫРОВА, VII кылаас,

В.И. Ленин аатынан Уолба орто оскуолата, Таатта