“Снежный барс” XXV өрөспүүбүлүкэтээҕи байыаннай-спортивнай оонньуулар үс күн устата ыытылларыгар үрүҥ халааттаах аанньаллар – быраастар эмиэ көмөлөстүлэр.
Парасковья Петровна Макарова И.М Павлов аатынан Чурапчытааҕы интэринээт-оскуола гигиенитическэй иитиигэ инструктора. Кини оҕо эрдэҕиттэн оҕо эйгэтигэр үрүҥ халааттаах аанньал быһыытынан сылдьыан баҕа санаатын толорон, 2016 сылтан интэринээт-оскуолаҕа үлэлиир. Бу иннинэ Дьокуускайга Медицинэ киинигэр, хирургическай отделениеҕа үлэлээбит. Онон Парасковья Петровна уопуттаах медик быһыытынан элбэх күрэхтэһиилэргэ сылдьар.
– Күрэхтэһиилэргэ оҕолор төһө да страховкалаах кэлбиттэрин иһин, аттыларыгар син биир медик баара ирдэнэр. Үксүгэр оҕолор төбөлөрө ыалдьан, эчэйии ылан биһиги көмөбүтүгэр наадыйаллар. Күрэхтэһии кыттааччыларын ортотугар улахан эчэйии тахсыбатах буоллаҕына, медиктэр күрэх үчүгэйдик ааста диэн үөрэбит. Быйылгы “Снежный барс” олус үчүгэйдик ааста, – диэн этэр Парасковья Петровна Макарова.
Кира ГАВРИЛЬЕВА, VII кылаас,
С.Д. Флегонтов аатынан Хадаар орто оскуолата, Чурапчы