Кулун тутар 25-27 күннэригэр Чурапчы улууһугар “Снежный барс” XXV өрөспүүбүлүкэтээҕи байыаннай-спортивнай оонньуулар буолан аастылар.
Быйылгы тэрээһин туһунан Чурапчытааҕы С.К. Макаров аатынан гимназия ОБЖ уонна география учууталын, “Беркут” хамаанда байыаннай-патриотическай салайааччыта Сергей Сергеевич Абрамовы көрсөн кэпсэттим.
– Чурапчы улууһугар байыаннай-патриотическай үлэҕэ, уол оҕону байыаннай дьыалаҕа иитии күүскэ ыытыллар. Ол туоһутунан биһиги улууспут “Снежный барска” быйыл төрдүс төгүлүн өрөспүүбүлүкэҕэ бастакы миэстэ буолла. Онон Россиятааҕы байыаннай-спортивнай оонньууларга Саха сирин чиэһин көмүскүү төрдүс сылбытын барар буоллубут. Манна Россия 89 регионуттан бары кэлэн кытталлар. Урукку сыллары ылан көрөр эбит буоллахпытына, 10 иһигэр сылдьар этибит уонна биирдиилээн көрүҥнэргэ оҕолорбут миэстэлэһэр этилэр. Былырыын ытыыга Россияҕа биэс иһигэр киирбиппит.
– Улуус хамаандаларын састаабын билиһиннэриэххит дуо?
– “Снежный барс” Чурапчыга ыытыллар буолан, балаһыанньа быһыытынан Чурапчыттан икки хамаанда хайаан да кыттар. Онон улуус оскуолаларыттан оҕолору сүүмэрдээн икки хамаанданы туруоран кытынныбыт. Холобур, быйыл өрөспүүбүлүкэҕэ бастаабыт “Факел” хамаандабытыгар Алаҕар, Мурун оскуолаларыттан уонна интэринээт-оскуола бэйэтин оҕолоро бааллар. “Факел” хамандыыра Антон Иванов. Байыаннай-патриотическай салайааччылара Чурапчытааҕы интэринээт-оскуола ОБЖ учуутала Пётр Назарович Егоров уонна И.М. Павлов аатынан Чурапчы орто оскуолатын ОБЖ учуутала Александр Андреевич Оконешников. Оттон иккис миэстэни ылбыт иккис хамаандабыт – “Беркут”. Хамандыыр Никита Захаров. Байыаннай-патриотическай салайааччылара С.А. Новгородов аатынан Чурапчы орто оскуолатын ОБЖ учуутала Дмитрий Петрович Соловьев уонна мин.
– Чурапчы улууһун «Факел», «Беркут» хамаандаларын кыайыыгытынан эҕэрдэлиибин!
Алена КСЕНОФОНТОВА, VII кылаас,
С.Д. Флегонтов аатынан Хадаар орто оскуолата, Чурапчы