Үһүс уһун чиэппэрбит биир ыйа үөрүү-көтүү аргыстаах олус түргэнник ааста. Үгүс түбүктээх эрээри, кэрэхсэбиллээх тэрээһиннэр буоллулар.
Улууспутугар ангылычаан тылын учууталларын методическай холбоһугун тэрийиитинэн омуктуу ырыа куонкуруһа буолла. Онно 10 оскуолаттан 150 оҕо кытынна. Биһигиттэн Сайыына Бочурова (VII кыл.), Алина Никонова (VIII кыл.) «Love story» ырыаларынан I стененнээх лауреат, Дарина Егорова, Сайина Сергеева (9 кыл.) дуэттара II ст. дипломант, трио Саня Собакин, Данил Егоров, Айастаан Карбаканов «Uptown Funk» диэн ырыаны толорон, лауреат II ст. буолан, астынан кэлбиппит. Салайааччыларбыт — омук тылын учуутала Р.В.Баишева, музыка учуутала Л.А. Егоров.
Олунньу 12 күнүгэр Туора Күөл оскуолатыгар сылын аайы тиһигин быспакка ыытыллар «Уоланнар түһүлгэлэрэ» улуустааҕы тэрээһин, өрүү буоларын курдук, үрдүк таһымнаахтык ыытылынна. Алын кылаас уолаттара С.Р. Кулачиков-Эллэй хоһооннорунан «Саһыл Сыһыыга» уус-уран дьүһүйүүнү аахтылар, лауреат үрдук аатын ыллылар. Үһүс кылаас үөрэнээччитэ Гоша Капитонов «Капитан Гастелло» хоһоону ааҕан, III степеннээх дипломант буолла. Кырачаан кыттааччылар, I-IV кылаас уолаттара, кыргыһыы саллааттарын олус долгутуулаахтык оонньоон, айымньыны киһи дууһатыгар киирэр гына арыйдылар.
Ити күн “Ыллаа-туой, уол оҕо” ырыа күрэҕэр Х кылаас үөрэнээччитэ Саня Собакин «Нарыннык туттаҥҥын» ырыатынан Гран-при буолла, муҥутуур кыайыылаах үрдүк аатын ылан, барыбыт сүргэбитин көтөхтө. Бу кылаас «Уолбан» бөлөҕө «Сахам ата» ырыанан 2 степеннээх дипломант буолла. Салайааччылар И.Н. Беляев, Л.А. Егоров.
Ытык Күөл 2-с нүөмэрдээх оскуолата алын сүһүөх кылаас уолаттарыгар анаан Х төгүлүн ыыппыт байыаннай күрэхтэһииитигэр биһиэннэрэ «Бастыҥ строевой бэлэм» анал ааты, сэрии техникатын макетын оҥорууга, военизированнай эстафетаҕа үһүстээтилэр.
Кырачааннарбыт Дьохсоҕон оскуолатын тэрийиитинэн ыытыллыбыт С.Р. Кулачиков-Эллэй төрөөбүтэ 115 сылыгар аналлаах региональнай куонкуруска эмиэ ситиһиилээхтик кыттан кэллилэр. Дьүһүйүүгэ II миэстэни, «Кыыс бастыҥ оруола» анал ааты Кусатова Эля (III кылаас), «Дьэрэкээн оҥоһук» айымньыны ааҕан баран, илиинэн оҥоһук оҥорбут IV кылаас үөрэнээччилэрэ Маша Рахлеева, Гоша Капитонов анал ааты, I-II кылаас үөрэнээччилэрэ I миэстэни ыллылар. Уруһуйга I кылаас үөрэнээччилэрэ Хастаева Диана бастаата, А. Афанасьев үһүстээтэ, Д. Егорова иккистээтэ. Я. Постникова «Уран уруһуй» анал ааты хаһаайына буолла. Салайааччылар: Д.И. Винокурова, А.Б. Егорова, Э.И. Гаврильева, В.П. Рахлеева, Ф.Е. Иванова, В.Г. Кусатов.
Спортсмен уолаттарбыт Дьокуускай куоракка мас тардыһыытын өрөспүүбүлүкэтээҕи күрэҕэр кыттан, Айсен Рахлеев (VIII кылаас) I миэстэни ылла, Мосоркин Аким (IX кылаас) иккистээтэ. Тренер А.М. Неустроев.
Нэһилиэкпитигэр, оскуолаҕа Ийэ тыл күнэ үрдүк тэрээһиннээхтик барда. Саха тылын төһө билиигэ араас тургутар түһүмэхтэрдээх квест-оонньуу, «Умсулҕан» МО тэрийиитинэн «Өркөн өй» оонньуу, бэйэ илиитинэн өйү эрчийэр оонньуурдары оҥорууга куонкурус, «Умсулҕан» тыл оонньуута, хамаандаларынан күрэхтэһии уонна биирдиилээн оҕолор, тылы билиигэ нэдиэлэ устата баал хомуйан, ол баалларынан аукциоҥҥа сыаналаах бириис иһин кытыннылар.
Ааҕыы күнэ, сахалыы диктант суруйуута, биктэриинэлэр, чабырҕах куонкуруһа, Театр сылыгар аналлаах тэрээһин, ангылычаан тылынан сценкалары туруоруу — бу манна барытыгар уһуйаан оҕолоруттан саҕалаан, төрөппүттэрдиин, учууталлардыын бары бииргэ кытынныбыт.
Аҕа дойдуну көмүскээччилэр күннэригэр аналлаах тэрээһиҥҥэ күүстээх аҥардар түөлбэнэн волейболга, дуобакка, сахалыы остуол оонньуутугар, сыал ытыытыгар, көрдөөх эстафетаҕа күрэхтэстилэр. Строевой хаамыыны көрдөрдүлэр.
Оскуола уолаттарыгар «Тарбаахаптыы астыахха» күрэхтэһиилэрэ үрдүк таһымнаахтык ааста. V-XI кылаастар уолаттара кытыннылар. Кыайыылааҕынан VIII кылаас үөрэнээччитэ Сергей Окороков буолла, иккиһи Корякин Никита (IX кылаас), үсүһү Борисов Уйсиэн (VII кылаас) уонна Карбаканов Айастаан (X кылаас) ыллылар, онтон атыттар бары анал аат хаһаайыннарынан буоллулар.
Үөрүүбүтүн өссө үксэттилэр уһуйааммыт оҕолоро, ый бүтэһик күннэригэр ыытыллыбыт «Бриллиантовые нотки» куонкуруска. Кырачааннарбыт «Стрекоза и муравей» үҥкүүнү толорон (салайааччы М.Т. Боппосова), I степеннээх лауреат үрдүк аатын ылан, өссө Калининград куоракка фестиваль-куонкурсука барар ыҥырыыны тутан, ситиһиилэринэн барыбытын үөртүлэр.
Бу курдук үөрэ-көтө көхтөөхтүк уонна көрдөөхтүк олоробут.
Алина Никонова, Алгыс Неустроев
Уолба Ленин аатынан орто оскуолатын VIII кылааһын үөрэнээччилэрэ.