Уһун өрөбүл бүтэһик күнүгэр, олунньу ый 26 күнүгэр СӨ ситэриилээх былааһын уорганнарын отчуота Хаҥалас нэһилиэгэр ыытылынна. Мунньах модун Арассыыйа, тапталлаах Сахабыт сирин Өрөгөй ырыаларын сүһүөххэ туран, киэн тутта истииннэн саҕаланна.
Мэлдьи буоларын курдук нэһилиэк олохтоохторо мунньахха ахтыыбынайдык кэлэн, 58 киһи кэлэн отчуоту сэргээн иһиттэ. Бөлөҕү салайан кэлбит СӨ Бырабыыталыстыбатын бэрэссэдээтэлин солбуйааччы Михаил Викторович Никифоров ситэриилээх былаас 2022 сыллааҕы отчуотун уу сахалыы лоп бааччы саҥаран кэпсиирин, бэрт судургутук быһаарарын, нэһилиэнньэ ордук сэргээн, биһирээн иһиттэ. Мунньах иннинэ 3 киһи кэлэн тустаах боппуруоһунан салайааччылары көрүстэ.
Олохтоохтортон:“Талакааннааҕы нефть хостонор баайыттан Саха сирэ нолуоктан ураты тугу туһанарый, бээбит баайбыт быһыытынан арыый чэпчэки уматыгынан тоҕо туһаммаппыт,Чомчоев А.И. айбыт атомнай уот биэрэр министанциятын туһаныыга туох санаалааххытый,Федеральнай сокуону кэһиигэ ыстараап араас көрүҥнэриттэн республика бюджетыгар төһө доход киирэрий, чааһынай биэлээх киһиэхэ тоҕо субсидия көрүллүбэтий, Кировскайдааҕы чоҕу хостуур карьер чоҕун хаачыстыбатын тупсарыыга туох үлэ барыай?”- диэн боппуруостары биэрдилэр.
Ыаллыы сытар Түмүк нэһилиэгин бааһынай хаһаайыстыбатын салайааччыта Егор Егорович Иванов сыал сорук оҥостон кэлэн,тыа хаһаайыстыбатыгар сыһыаннаах элбэх боппуруостары сэргэ баҕа санааларын тириэртэ. Ол курдук күннэтэ үүт, эт дэлэйэрин туһугар сыллата сыралаһан үлэлии сылдьар тустаах үлэһит: “үүт харчыта бириэмэтигэр сөптөөхтүк кэлэригэр, сэлээркэ сыаната үрдүү турара, техника ылынарга урукку “Туймаада лизинг” курдук уһун болдьоххо биэрэр тэрилтэ баара буоллар, Сунтаарга комбикорм оҥорор собуота кыамтата, хаачыстыбата хайдаҕый, сири нүөлсүтэр үлэни чөлүгэр түһэриигэ туох үлэ барыаҕай ,чуолаан урукку өттүгэр 3-с нэһилиэги оттотон, аһатан олорбут “Сата” мелиоративнай систематыгар харчы көрүллэн, кэскиллээх үлэ барарыгар» баҕа санаатын тириэртэ.
Нэһилиэнньэҕэ сыллата уокка төлөнөр тарыып үрдүү турарынан, онтон уот хаачыстыбата онно ырааҕынан эппиэттээбэтин туруорсан, Хаҥалас нэһилиэгин олохтоохторун аатыттан “Якутэнерго” генеральнай директора Стручков А.А аатыгар элбэх киһи илии баттааһыннаах туруорсуу Суругу улуустааҕы общественнай сэбиэт чилиэнэ Николаев Н.В. СӨ Бырабыыталыстыбатын бэрэссэдээтэлин солбуйааччы Михаил Викторович Никифоровка туттарда.
Түмүккэ нэһилиэк олохтоохторо СӨ Бырабыыталыстыбатын 2022 сыллааҕы отчуотун биһирииллэрин биллэрдилэр,бөлөх салайааччыта Михаил Никифоров: “Доруобай кириитикэ баарын мэлдьи биһириибин, тыа дьоно сайын эрдэ окко киирэн оттооҥ, хаачыстыбалаах оту булуна сатааҥ,оҕуруот аһын дэлэйдик үүннэрэн, бородууксуйаны бэйэҕит оҥостон байылыаттык олоруҥ”-диэн баҕа санаатын эттэ.
Ньурба оройуонун Аҕа баһылыга Алексей Михайлович Иннокентьев 2024 сылга Ньурба улууһа 200 сыллаах үбүлүөйүгэр Бырабыыталыстыба хамыыһыйатын бэрэссэдээтэлинэн СӨ Бырабыыталыстыбатын солбуйааччыта Михаил Викторович Никифоров бэйэтин сөбүлэҥин биэрбитигэр махталын биллэрбитин, олохтоохтор ытыс тыаһынан көрүстүлэр.
Мария Николаева,
“Ньурба” хаһыат уопсастыбаннай кэрэспэндьиэнэ.