Дьокуускай куорат 12-ис №-дээх орто оскуолатын 9-с кылааһын үөрэнээччитэ Семенова Сандаара соторутааҕыта «Сириус» үөрэх киинигэр сылдьан кэллэ. Кини онно Саха сириттэн соҕотох эбит. «Литературное творчество» сменаҕа тугу билбитин-көрбүтүн үллэстэр. Куорат кыыһа диэтэххэ, Сандаара сахалыы ыстатыйаны олус үчүгэйдик суруйбута кэрэхсэбиллээх.
Мин аатым Семенова Сандаара, Дьокуускай куорат 12-ис №-дээх орто оскуолатын 9-с кылааһын үөрэнээччитэбин. Мин Краснодарский кыраайга Адлер диэн куоракка «Сириус» үөрэх киинигэр сылдьыбытым.
Сменам аата – «Литературное творчество» диэн этэ, өссө эбии «Спорт» уонна «Наука» сменалара бааллара. Үөрэхпит киинигэр уопсайа 784 оҕо үөрэммитэ, онтон биhиги смена оҕото 142 этибит. Мин Саха сириттэн соҕотох этим. Сменабыт кулун тутар 3-тэн 27 күнүгэр дылы буолбута. Бириэмэм элбэх курдук этэ даҕаны, олус түргэнник ааспыта.
Бу кэмнэргэ мин «Филологическое иследованияҕа» кыттыбытым. Ол аата оҕолортон уонна улахан дьонтон классическай литератураҕа сыһыаннаах интервью ылыы уонна эппиэттэри барытын мунньан баран тэҥнээн көрүү. Кэлин бу бырайыакпытын дьоҥҥо-сэргэҕэ билиһиннэрии буолбута. Мин саамай сэргээн көрбүтүм диэн – мин саастыы оҕолор уонна улахан дьон А.А. Блок «Художник должен показывать, а не доказать» диэн цитататын кытта сөбүлэһэллэр эбит. Онтон эһиги сөбүлэһэҕит дуо?
Өссө «Ааҕыы волонтёрдарын уһуйаана» диэҥҥэ үөрэнээччинэн киирбитим. Бу оскуола кинигэ ааҕыыны өрө көтөҕүүннэн дьарыктанар. Онно мин саҥа проект оҥорорго, дьону кытта кэпсэтэргэ, өйдөһөргө үөрэммитим. Ону таһынан өссө атын сорудахтаах этибит – бэриллибит айымньылартан талан бэйэн санааҕын суруйуу.
Оҕолор саамай үчүгэй айымньыларын «Сириус» үлэһиттэрэ «Альманах» диэн элэктроннай кинигэ сайтыгар таhаараллар. Эһиги онно киирэн ааҕыаххытын, көрүөххүтүн сөп: http://lit.sochisirius.ru/
Бу 2020 сыл А.П.Чехов, И.А. Бунин, Б.Л.Пастернак, А.А.Блок, Ю.В.Стругацкий, М.М. Достоевский, А.Белый, А.А.Фет, М.А. Булгаков үбүлүөйдээх сыллара эбит. Онон кинилэр айымньыларынан учууталларбыт эссе, (критический отклик) сыанабыл, өйтөн суруйарга үөрэппиттэрэ.
Үөрэхпит таһынан эбии дьарыктаах этибит – хамаанданан ону-маны оҥоруу. Холобура, мин «Книга, камера, мотор!» диэҥҥэ киирбитим. Хамаандабыт сыала-соруга – биир айымньыны талан ис хоһоонунан трейлер оҥоруу. Биһиги Михаил Афанасьевич Булгаков «Роковые яйца» диэн сэһэнинэн үлэлээбиппит. Өскөтүн эн наукаҕа сыһыаннаах, фантастиканана уонна араас кыылларынан үлүһүйэр буолаххына, бу кэпсээни ааҕаргар сүбэлиибин.
Мин «Сириуска» сылдьан элбэҕи биллим-көрдүм уонна саҥа доҕордоннум.
Ааптар: Сандаара Семенова