Олунньу 13 күнүгэр Сунтаар улууһун Кэмпэндээйитигэр «Сир уустара» лааҕыр оҕолорго анаан аанын аста. Биһиги Ньурбабыт оройуонуттан 10 оҕо сынньана, чэбдигирэ бу лааҕырга барда.
«Сир уустара» лааҕыр кэрэ айылҕалаах, эмтээх тууһунан уонна бадараанынан биллэр Кэмпэндээйи нэһилиэгэр баар. Бу лааҕыр уруккута аатырбыт санаторий баазатыгар сөргүтүллэн оҕолорго анаан үлэлии турар.
Биһиги Хаҥаласпыт оскуолатыттан Кэмпэндээйигэ икки оҕо баран дуоһуйа сынньана сылдьаллар: 8 кылаас үөрэнээччилэрэ — Нелли Антонова уонна Эльдар Мордовской. Кинилэр күннэтэ доруобуйаларын чэбдигирдээри араас процедураларга сылдьаллар, чөл олох үөрүйэхтэригэр үөрэнэллэр.
Биһиги оҕолорбут өссө да бу ый бүтүөр диэри сылдьыахтаахтар, олус астынан сылдьалларын этэллэр. Манна элбэх оҕо мустан эбии дьарыктарынан аралдьыйаллар, бэйэ бэйэлэрин кытары билсэн оонньууллар, үөрэнэллэр эбит. Бу маннык оҕону үөрэх эрэ өттүнэн сайыннарбакка, доруобуйатын туругун тупсарар, чөл буоларыгар көмөлөһөр лааҕырдар бааллара туһалаах уонна наадалаах.
Олег Адамов, «Ыллык» эдкорпост, Ньурба Хаҥалас.