Сэтинньи 18 күнүгэр Аан дойду үрдүнэн Оҕоҕо быраап өттүнэн көмө күнэ бэлиэтэнэр. Бу күн чэрчитинэн биһиэхэ, VIII кылаастарга, РФ Силиэстийэлиир кэмитиэтин Саха сиринээҕи салаатын ураты суолталаах дьыаланы чинчийиигэ бастакы отдел салайааччыта, юстиция подполковнига Александр Прокопьевич Якушев ыалдьыттаата.
Кини Силиэстийэлиир кэмитиэт үлэтин-хамнаһын уратытын өйдөттө уонна бу уорган атын быраабы көмүскүүр уорганнартан туох уратылааҕын быһаарда.
Биһиги олус интэриэһиргээтибит, араас ыйытыылары биэрдибит, хоруйдары тута иһиттибит. Аны туран, “арай бу бибилэтиэкэҕэ көмпүүтэри уорбут буоллуннар, хайдах силиэстийэ ыытыа этигитий”, диэн ыйытта. Биһиги бары саас-сааһынан, хайдах, туохтан саҕалыырбытын ырыттыбыт. Онуоха кини сыыһаларбытын көрөн, көннөрөн биэрдэ. Түмүгэр, уоруйаҕы харытыттан харбаабыт курдук сананныбыт, олус диэн астынныбыт.
Мин бу кылаас чааһын олус сөбүлээтим. Атын да оҕолор бу көрсүһүү кэнниттэн силиэдэбэтэл буолуохтарын баҕарбыттара саарбаҕа суох. Учууталларбытыгар бииртэн биир интэриэһинэй дьону кытта билиһиннэрэллэригэр махталбыт муҥура суох.
Айтал Христофоров, Герой Ф. К. Попов аатынан Дьокуускайдааҕы 20 №-дээх оскуола VIII “Г” кылааһын үөрэнээччитэ.