– Бэйэҥ туһунан кылгастык билиһиннэр.
– Мин аатым Шергин Георгий, 2012 сыллаахха V-с «Азия Оҕолоро» норуоттар икки ардыларынааҕы спортивнай оонньууга кыттыбытым. Саха Сирин сүүмэрдэммит хамаандатын бастакы хамаандатыттан атах оонньуутугар уонна чэпчэки атлетика үстэ төхтүрүйэн ыстанан кыттыбытым. Билигин Россияҕа спорт маастырыгар кандидат, Саха сирин атах оонньуутун спордун маастыра буолабын.
– Хайдах бэлэмнэнэр этигитий?
– «Азия оҕолоругар» бэлэмнэнэр күрэхтэһиилэрбит, сбордарбыт хас даҕаны этабынан ааспыттара. Хамаанда туоларыгар уонна оҥороллоругар уопсайа 3-4 этап ааспыппыт. 3-4-тэ күрэхтэһэн, 2-тэ сборданан Дьокуускай куоракка олорон, Волгоград куоракка баран, сборданан кэлэммит, хамаандабытын оҥорбуттара. Бэлэмнэнии бастакы этаптара үксүн дойдубутугар буолбута. Бары атын улуустартан кыттыбыппыт: Сунтаар, Кэбээйи, Үөһээ-Бүлүү, уонна мин Мэҥэ Хаҥаластан. Ыам ыйыттан саҕалаан, ОГЭ-бытын эрдэ туттаран, көҥүл ыламмыт, куоракка киирэн күрэхтэһии буолуор дылы дьарыктанан, кыттыыны ылбыппыт.
– Бу оонньуулар эйиэхэ тугу биэрбиттэрэй?
– Бу оонньуулар миэхэ бастатан туран элбэх эрэллээх доҕоттору биэрбитэ. Төрдүө буолан кыттыбыппыт. Уон икки сыл ааспытын да кэннэ, баччааҥҥа дылы, билсэбит алтыһабыт. Уонна саамай сүрүнэ диэн, салҕыы дьарыктанар баҕа санаа биэрбитэ. Итиччэ улахан международнай күрэхтэһиилэргэ кыттан, уопут ылан, киһи салҕыы сайдыан-үүнүөн баҕарар. Уонна бэйэҕэр эрэл киирэр, тоҕо диэтэххэ, атын дойдулар кэлэн кытталлар. Уонна бу маннык Саха сирин курдук, ыраах олороммут, Центральнай Россияны, атын дойдулары кытта тэҥҥэ күрэхтэһиэхпитин, сүүрүөхпүтүн-ыстаныахпытын сөп диэн эрэл киирэр.
– «Азия оҕолоро» оонньуу оҕоҕо наадалаах дуо?
– Оҕоҕо хайаан да наадалаахтар дии саныыбын.
– Бастакы тренердэриҥ кимнээх этилэрий?
– Бастакы тренерым Ильин Борис Николаевич, СӨ үтүөлээх тренера уонна Илларионов Петр Афанасьевич.
– Бу сылга кыттар оҕолорго тугу баҕарыаҥ этэй?
– Бу сылга кыттар оҕолорбутугар баҕарыам этэ, бэйэҕэ эрэли. Хамаандаҕа киирбиккит улахан хардыы буолар. Хамаандаҕа киирдигит даҕаны, бүтүн Өрөспүүбүлүкэ чиэһин көмүскүү бараҕыт. Эһиги кэннигититтэн хас биирдии ыалдьааччыгыт, көрөөччүгүт эһигини көрдө даҕаны бүтүн Саха сирин, улуускутун, нэһилиэккитин көрөр. Онон, хайаан даҕаны кытаатан, бэйэҕит кыаххытын аһары баран, туох баар күүскүтүн-санааҕытын ууран туран, кыайыыга дьулуургутун көрдөрөргүтүн баҕарабын.
Диана Романова, 10 кылаас, Майа лиссиэйэ, Мэҥэ Хаҥалас
Лилиана Шестакова, 9 кылаас, Майа лиссиэйэ, Мэҥэ Хаҥалас