«Кэскил» медиа-оскуола юнкордара Российскай Федерация сенаторын, Саха өрөспүүбүлүкэтин үһүс Бэрэсидьиэнин, Бастакы Ил Дарханын Егор Афанасьевич Борисовы кытта сэһэргэһиибитигэр билиҥҥи үлэтин-хамнаһын туһунан интэриэһиргээн ыйыталастым.
– Российскай Федерация сенатора – олус интэриэһинэй, эппиэтинэстээх үлэ, – диэн этэр Е.А. Борисов.
Бу Россия сокуону оҥорор былааһын биир үрдүкү эппиэтинэстээх үлэтэ. Судаарстыба сайдыытын, кини олоҕун-дьаһаҕын тула үөскүүр боппуруостары, кыһалҕалары сокуон хараҕынан көрөн быһаарар.
Егор Афанасьевич Федерация Сэбиэтин үлэтин үс сүрүн хайысхатын туһунан быһааран кэпсээтэ.
– Бастакынан, Россия Государственнай Думатыгар кэлэр боппуруостар, дьаһаллар үлэҕэ киирэллэрин Федерация Сэбиэтэ быһаарар күүстээх. Өскөтүн ылыллыбыт сокуоннар Федерация олоҕор сөп түбэспэт, барсыбат буоллаҕына, ону тохтотобут. Сокуону оҥоруу хаачыстыбалаахтык быһаарылыннын диэн биһиэхэ икки палаата баар. Госдума көрөн, куоластаабытын кэннэ Федерация Сэбиэтэ түмүктүүр тылы этэбит.
Иккиһинэн, биһиэхэ силовой блоктар көрүллэллэр. Ол аата өскөтүн Россия Президенэ мөккүөрдээх боппуруоска Федерация Сэбиэтиттэн ыйытар. 2022 сыллаахха Донецкай уонна Луганскай өрөспүүбүлүкэлэр куораттарыгар 8 мөлүйүөн киһи Россия өттүттэн көмөҕө, өйөбүлгэ наадыйар диэн Президеммит Владимир Владимирович Путин Федерация Сэбиэтигэр тахсыбыта. Бу боппуруоска үлэлэһэбит дуу, суох дуу диэн ырытыһыы кэнниттэн куоластааһын буолбута. Ол түмүгэр анал байыаннай дьайыылар туһунан дьаһал барбыта. Федерация Сэбиэтэ дойду иннигэр сүрдээх улахан эппиэтинэһи сүгэр.
Үсүһүнэн, кадровай боппуруостар. Конституционнай суут бэрээссэдээтэлин, генеральнай прокурор, судьуйалар, Ис дьыала министиэристибэтин уо.д.а. Бырабыыталыстыба тутаах үлэһиттэрин анааһын – барыта Федерация Сэбиэтин нөҥүө ааһар.
Егор Афанасьевич Борисов бэйэтэ аграрнай-продовольственнай политикаҕа уонна айылҕаны туһаныы кэмитиэт солбуйааччы бэрэссэдээтэлинэн үлэлиир. Онон манна анаммыт боппуруостарынан дьарыктанар.
Билиҥҥи кэмҥэ улаханннык ылсан үлэлэһэ сылдьар боппуруоһа – сылгы иитиитэ. Россия урукку өттүгэр 40 мөлүйүөн сылгылаах эбит буоллаҕына, билигин 1,5 эрэ мөлүйүөн баар.
– Сүрдээх элбэх боруода сылгы көрүллэн-харайыллан тахсыбыта барыта эстибэтин туһугар үлэлэһэ сылдьабын. Маны таһынан дьонум-сэргэм миигин билэр буолан, элбэх киһи араас ыйытыыларынан кэлэр. Ордук элбэх доруобуйа харыстабылын өттүнэн буолар. Анал байыаннай дьайыыга дойдуларын көмүскүү сылдьар уолаттарбыт көрсөр кыһалҕаларын быһаарыы билигин сүрүн сорук быһыытынан турар. Төһө кыалларынан, кыаҕым тиийэринэн көмөлөһөбүн, – диэн этэр Егор Афанасьевич.
***
Россия сенаторыгар биэрбит иккис ыйытыым Москва куорат туһунан буолла.
Быйыл сайын «Кэскил» медиа-оскуола юнкордара Москва куоракка бара сылдьыбыппыт, олус элбэҕи билэн-көрөн кэлбиппит. Онтон Егор Афанасьевич дойду тэбэр сүрэҕэр Москваҕа сөбүлээн сылдьар сирэ ханнык эбитий?
– Москваны олус үчүгэйдик билэбин. 40-ча сыл буолла дойдубут киин куоратыгар сылдьыбытым. Икки сөбүлээн сынньанар сирдээхпин. Бастакыта – «Лужники» стадион. Киһи кута-сүрэ тохтуур, чуумпу сир. Москва өрүһү, спортсменнар сүүрэ, эрчиллэ сылдьалларын көрөн сынньанабын. Иккис сөбүлүүр сирим – Поклоннай хайа, онно Кыайыы паарката, Кыайыы музейа, киинэ тыйаатыра баар. Поклоннай хайа диэки чугас олорор буоламмын, манна тахсан сынньанабын, хаамабын.
Билигин Москва олус сайдан, сылдьар сирдэрэ үксээн, киһи иллэн кэмин атаарарыгар олус элбэх сир баар буолла. Саамай үөрэрбит диэн тыа сирин үлэһит дьону уруйдуу көрсүбүт ВДНХ сөргүтүллэн, Россия дьонун-сэргэтин түмэр кыахтанна, – диэн Егор Афанасьевич бэйэтин санаатын эттэ.
Вадим КОЛЕСОВ, Х кылаас,
А.П. Илларионов аатынан Хайахсыт орто оскуолата, Чурапчы