Ахсынньы 8 күнүгэр Саха АССР төрүттэммитэ 100 сылыгар аналлаах нэһилиэкпит олохтооҕо коллекционер Игорь Владимирович Филиппов муспут коллекциятын оскуола оҕолоругар анаан «Сэгэтэн кѳрѳбүт ол ааспыт кэмнэри» диэн быыстапкатын алын кылаас учууталлара тэрийэн ыыттылар.
И.В. Филиппов араас мал-сал хомуйар, мунньар эбит. Бу тэрээһини алын кылаас оҕолоро урукку үҥкүүлэри флешмобтаан арыйдылар. 5 кылаас үѳрэнээччилэрэ Сэбиэскэй Сойуус кэминээҕи «Взвейтесь кострами», «Учат в школе», «Улыбка», «Пусть всегда будет солнце», «Вместе весело шагать» ырыалары попурри толордулар, 3 кылаас үөрэнээччитэ Сандал Антонов «Мин саллаат уолабын» Петр Тобуруокап хоһоонун доргуччу аахта, тэрээһини салайан ыыппыт Ирина Николаевна Жиркова оҕолорго аһылык (бородуукта) арааһын презентациялаан, урукку уонна билиҥҥи сыанатын тэҥнээн көрдөрдө.
Быыстапкаҕа урукку кэм араас мала, былыргы учебниктар, 1900, 1901, 1938, 1941 сыллааҕы кинигэлэр, биллиилээх дьон, суруйааччылар бүүстэрэ, былакааттар, үөрэх тээбириннэрэ, вымпеллар, ырыа пластинкалара, Советскай Сойуус геройдарын хаартыскалара, значоктар, тимир конструктор, байыаннай формалар, онтон да атын араас тэрил уурулунна. Биир альбомҥа урукку бырааһынньыктар открыткалара, иккис альбомҥа 60-70-80 сс. киинэ актердарын хаартыскалара, атын альбомнарга хармаан халандаардара, лотерея билиэттэрэ угуллубуттар. Коллекциятыгар саамай бары сөҕөн көрбүппүт араас дойду харчыта буолар. 1920 сыллааҕы манньыаттартан саҕалаан, тас дойдулар харчылара, үбүлүөйдээх манньыаттар, отой былыргы кумааҕы харчылара, 25-тии солкуобайдаах манньыат арааһа бааллар. Элбэх да харчы арааһа баар эбит.
Ааспыт кэм быыстапкатын бары олус интэриэһиргээн, сэҥээрэн, тутан-хабан көрдүлэр. Өйдөбүнньүк буоллун диэн хаартыскаҕа түһэн астыннылар. Игорь Владимирович баай коллекциятын оскуола коллективыгар кѳрдѳрбүтүн иһин махтанабыт. Өссө да итинник сонун быыстапкалар буола турдуннар.
Инга Петрова, 6 кылаас үөрэнээччитэ,
«Көмүс бөрүө» пресс-киин, М.А. Алексеев аатынан Баппаҕаайы оскуолата, Бүлүү.