Быйыл Саха Автономията төрүттэммитэ 100 сыллаах үбүлүөйүгэр уонна Арассыыйаҕа норуоттар култуурунай нэһилиэстибэлэрин сылыгар оскуолабытыгар олус бэртээхэй тэрээһин «Schoolfest» фестиваль буолан ааста.
Ол курдук, муус устар 27 күнүгэр, Өрөспүүбүлүкэбит күнүгэр бастакы кылаастан 10 кылааска диэри үөрэнээччилэр араас көрүҥҥэ кытыннылар. Фестиваль көрүҥнэринэн араас хайысхалаах: фольклор, уус-уран ааҕыы, ураты жанр, хореография уонна ырыа. Хас биирдии көрүҥ аайы тус-туһунан дьүүллүүр сүбэ үлэлэлээтэ. Көрөөччүлэр бары оҕолорбут дьоҕурдарыттан, талааннарыттан, сатабылларыттан сөхтүлэр.
Ураты (оригинальнай) жанрга бииртэн биир хатыламмат киһини сөхтөрөр нүөмэрдэр тахсан истилэр. Ол курдук, Ваня Иванов ким да күүппэтэх араас фокустара толоруута олус үчүгэйдэр, соһуччулар. Алина Терентьева күүскэ бэлэмнэммит: араас киһи сөҕөр дьикти уопуттары, интэриэһинэй нүөмэри көрдөрөн көрөөччү биһирэбилин ылла. Айаан Гермогенов фокустара соһуччу арыйыы буоллулар.
Үҥкүү күнэ биир туһунан соһуччу интэриэһинэй буолла. Оҕолор араас омук үҥкүүлэрин көрдөрдүлэр. Сүрдээҕин кичэйэн бэлэмнэммиттэр: көстүүмнэрэ, музыката — барыта сөп түбэһэр уонна хатыламмат. Салайааччылара — оскуолабыт хореограф-үҥкүүһүтэ А.А. Антонова.
Ырыа күнэ биир оннук. Бу фестивальга, ким да туора турбакка, бары кытыннылар.
Түмүккэ, дипломаннар, лауреаттар бэлиэтэннилэр, ону таһынан муҥутуур кыайыылаах эмиэ быһаарылынна. Ол курдук, ырыа күрэҕэр алын кылаастарга — 1 кылаас кэлэктиибэ, улахан кылаастарга — Альбина Шарина, үҥкүүгэ — 2 кылаас үөрэнээччитэ Сандаара Стручкова, 5 кылаас уолаттара монголлуу үҥкүүлээн мөккүөрэ суох гран-при хаһаайынынан буоллулар. Оттон ураты (оригинальнай) жанрга Ваня Иванов уонна 5 кылаас үөрэнээччилэрэ бастаатылар. Уус-уран ааҕыыга 3, 8 кылаастар кыайыылаах таҕыстылар.
Биирдиилээн кыайыылаахтары сэргэ жанрдарынан лауреаттар, дипломаннар баалларын холбоон фестиваль кыайыылаахтарын быһаардылар. Ол курдук, 4 кылаас уонна 7 кылаас кэлэктииптэрэ кыайыылаах тахсан, көһө сылдьар кубоктары туттулар. Учууталлар, төрөппүттэр, оҕолор маннык тэрээһини сэҥээрдилэр уонна инникитин үтүө үгэскэ кубулуйан ыытылла турарыгар баҕа санааларын тиэртилэр.
Валя СПИРИДОНОВА,
«Кустук» студия иитиллээччитэ, Хаптаҕай оскуолатын 10 кыл. үөрэнээччитэ.