Төрөөбүт тылынан санааны толору этэргэ, истээччигэ тириэрдэр дьоҕуру сайыннарарга аналлаах «Куолу-2023» күрэҕи 5-9 кылаас үөрэнээччилэригэр ыыттыбыт. Балаһыанньа быһыытынан «Мин кэпсиэхпин баҕарабын» түһүмэххэ куолуһут бастаан бэйэтэ бэлэмнэммит тиэмэтинэн кыттар, онтон иккис түһүмэххэ тута талан ылбыт соһуччу тиэмэтинэн кэпсиэхтээх.
Бастакынан кыттар нүөмэри 7 кылаас үөрэнээччитэ Кира Андреева тардан, «Манчаары — саха норуотун геройа» тиэмэни истээччилэригэр олус үчүгэйдик тириэртэ. Иккис кыттааччы Даша Санникова «Саха сылгыта» (5 кыл.) тиэмэни арыйда. Саха сылгытын көрүү-харайыы уонна эргиччи туһатын туһунан биллибит. Яша Сергеев (9 кыл.) «Спорт — тулуурдаахтар, дьулуурдаахтар дьарыктара» тиэмэнэн кытынна. «Эт-хаан эрчиллиитэ элбэх эми солбуйар, оттон эмп биир да эрчиллиини солбуйбат» диэн биллэр киһи этиитин холобур аҕалан туран кэпсээтэ. 6 кылаас үөрэнээччитэ Алексий Иванов «Интернет үтүө, мөкү өрүттэрэ » тиэмэни үчүгэйдик арыйда. Кини оҕолор элбэхтик төлөпүөҥҥэ олороллорун, оонньууларын эттэ. Оонньуу олорон хоттороору гыннахха үксүгэр кыыһырыахха, куһаҕан да тылы саҥарыахха сөп диир. Сатаан туһаннахха интернет ситимэ элбэх саҥаны билэргэ олус туһалаах диэтэ. 5-с кыттааччы Айхал Петров (6 кыл.) «Уол оҕо — айылҕа оҕото» тиэмэлээх. Кини дьиэ кэргэнин кытта айылҕаҕа сылдьа үөрүйэх буолан, сиэр-туом, үгэстэр тустарынан сиһилии кэпсээтэ. Алина Санникова (8 кыл.) темата — «Төрөөбүт тылым — мин барҕа баайым». Алина өс хоһоонун хото туттан холобурдаан, ортотугар остуоруйа кэпсээн истээччилэр болҕомтолорун тарта. Коля Дорофеев (6 кыл.) «Баай диэн — дьол дуо?» тиэмэҕэ хайдах өйдүүрүнэн санаатын толору этэн истээччилэрин сэргэхситтэ. 9 кылааска үөрэнэр Нарыйа Бугулова «Идэни таба талыахха» тиэмэни талбыт. Кини бастаан эмчит идэтин туһунан кэпсээтэ, онтон бэйэтэ бу идэҕэ туттарса барарга билиҥҥэттэн бэлэмнэнэрин, библиотекаттан кинигэ, ыйынньык уларсан ааҕа сылдьарын кэпсээтэ.
Иккис түһүмэххэ кыттааччылар «Олох үрүҥ-хара өрүттэрэ», «Ырыа — олох аргыһа», «Саха — ыалдьытымсах омук», » Ааҕыы — сайдыы төрдө», «Олоҕум бэйэм илиибэр», «Кырдьаҕастан алгыһын, эдэртэн эйэтин» о.д.а. тиэмэлэри талан төрөөбүт тылларынан санааларын толору тириэрдэргэ кыһалыннылар. Оҕолор тэрээһиҥҥэ бары олус эппиэтинэстээхтик сыһыаннастылар.
Түмүккэ бастыҥ куолуһут аатын Яша Семёнов, Коля Дорофеев, Алексий Иванов ыллылар.
Мин бары кыттааччылары олус интэриэһиргээн иһиттим. Бэйэм эмиэ кыттыбытым буоллар дии санаатым.
Айыына Петрова 6 кыл.,
«Эрчим» корпост, Дүллүкү, Үөһээ Бүлүү