Орто Халыма улууһун Г.Г.Софронов аатынан Өлөөкө-Күөл орто оскуолатын оҕолоро сайыҥҥы сынньалаҥнарын туһалаахтык атааралларыгар анаан сайын аайы күнүскү «Кэнчээри» лааҕыр үлэлиир. Манна 2-9 кылаас оҕолоро от ыйын устата оскуола оҕуруотун, теплицатын көрөн-истэн сыыс оту үргээн, уулатан бүөбэйдииллэр. Үүннэрбит оҕуруот аһын нэһилиэк олохтоохторугар тиэрдэн биэриилээх атыылыыллар. Маны таһынан, эмтээх оту хомуйан кучу чэйин хатараллар, ньээм-ньээм сибэккитин сиробун, кучу сибэккитин барыанньатын оҥорон атыыга таһаараллар, оскуола фитобарыгар хаһааналлар.
Лааҕыр иитиллээччилэрэ күн устата солото суох дьарыктаах буолалларын иитээччилэр Рахматулина Ю.А. уонна Богатырева В.И. тэрийэллэр, оттон мип-минньигэс аһынан, куйааска тоҕулу ханнарар утаҕынан Лаптева Е.Г. күҥҥэ иккитэ күндүлүүр.
Төһө да от ыйа биһиги улууспутугар саамай бырдахтаах ыйынан ааҕылыннар, оҕолор күннээҕи үлэлэрин олус кичэйэн толороннор оҕуруоту үүннэрии, оту-маһы кэтээн көрүүгэ, эмтээх оту сыһыыттан хомуйуу сатабылларыгар үөрэнэллэр. Хайдах хаһааныыга, харайыыга үөрэнэллэр.
Оҕолор ас астыыр баҕаларын толорон, иитээччилэр бурдук аһын астыырга маастар кылаастары ыыттылар, оҕолор үөрэ-көтө араас ас астаан амсайдылар. Эбиитин оҥоро үөрэнэн, атыыга астаан боруобалаатылар. Ол курдук, бэрэскии, ушки, орешка астааннар нэһилиэк олохтоохторугар сайаапканнан дьиэннэн тарҕатан атыылаатылар. Нэһилиэк олохтоохторо оҕолор астаабыт астарын амсайан, астынан сакаастааччы да баар, хайҕааччы да баар.
Оттон атыыттан киирбит харчыларын АБДЬ сылдьар биир дойдулаахтарбыт дьиэ кэргэттэригэр көмө быһыытынан биэрдилэр. Онон оҕолорбут кыра саастарыттан бириэмэлэрин сөпкө, туһалаахтык атааран аһыныгас майгылаах, үтүө санаалаах, дойдуларын таптыы, билэ үөрэнэллэр.
И.Ноговицына
Орто Халыма, Өлөөкө-Күөл б.