Самаан сайын кэлбитинэн! Үрүҥ тунах ыһыаҕынан! Эбээ Уйусхаана эһиэхэ анаан ыһыах, Үрүҥ Айыы Тойон суолтатын, сахалыы сиэр-майгы туһунан быһаарар.
Ыһыах
Ыһыах — күн ууһун, айыы аймаҕын дьоно бары бэлиэтиир олус былыргы туом. Ыһыах сайын кэлбитин эрэ уруйдуур бырааһынньык буолбатах. Ыһыах — үрдүкү өй. Атыннык эттэххэ, өйү-санааны бэйэҕэ бигэргэтии, үчүгэйи тардыы. Күн ууһа, айыы аймаҕа орто туруу дойдуну иччилии киирбитин өйдүүр-саныыр туома. Орто дойду алгыс былытынан өрө көтөҕүллэр. Оччоҕо аллараа дойдуттан, хараҥаттан, куһаҕантан тэйэбит, үөһээ дойдуга, айыыларга чугаһаан биэрэбит.
Бэс ыйа — Үрүҥ Айыы Тойон ыйа
Айхал! Айхал! Айхал!
Аан дойдуну
Айан-тутан оҥорбут,
Айыы киһитин тэһииннээбит,
Күн киһитин
Көхсүттэн көҥтөстөөбүт,
Үүт-аас бэйэкэлээх,
Үүт-таас олбохтоох,
Үкээр куйаас тыыннаах
Үрүҥ Айыы Тойон
Бэттэх көрөн мичик гынна!
Үрүҥ Айыы Тойон
Үрүҥ Айыы Тойон туох баар төрдүн барытын айбыт күүс — киһини, сири, сулустары, кыыллары. Киниттэн ордук сүдү күүс суох. Бу күүс киһиэхэ үтүө эрэ өттүнэн дьайар. Аан дойду бүтүннүү Үрүҥ Айыы Тойон алгыһынан көтөҕүллэн турар дииллэр.
Үрүҥ Айыы Тойон айыы суолугар саамай үрдүкү тохсус халлааҥҥа олорор. Кини наар күөҕүнэн чэлгийэ турар дойдулаах. Манна хаһан да кыһын, тымныы диэн кэлбэт. Үрүҥ Айыы Тойон айыы тоҕус халлаанын айан баран, уолаттарын, кыргыттарын — 35 биис ууһун — сир-дойду дьолун тутан олорун диэн орто дойдуга олохсута түһэрбит. Күн ууһа, айыы аймаҕа орто дойдуну иччилиир, тулатыгар баары барытын харыстыыр, олох уйгутун оІорор, үүннэрэр ытык аналбыт итинник үөскээбитэ.
Айыы оҕотугар кэс тыл
Тукаларыам! Бэс ыйын саамай алгыстаах, сылаас, сырдык кэмигэр сайыҥҥы сынньалаҥҥыт саҕаланар. Сайыны туһалаахтык атаараргытыгар сиэрдээх буолуу улахан суолталаах. Айыыларгын санаан «Дом!» диэ. Күн аайы туох эрэ саҥаны, сонуну, кэрэни булан көрө сатаа. Кыра да буоллун. Хоһоонно аах, хартыынаны болҕойон көр, уруһуйдаа, муусуката, ырыата иһит, ыллаа! Күнү бэлиэтии көр.
Үлэҕэ, үөрэххэ санааҕын уур. Үлэлээн, үөрэнэн астыныыны бил. Тиискин сарсыарда аайы сууна сырыт. Илиигин суун.
Утуйаары сытан айыыларгын санаан «Дом!» диигин. Кинилэр түүн салгын куккун харыстыыллар. Ыарахаҥҥа түбэстэххинэ кэҥээн биэр. Саха санаатынан кэҥээн, салайынан биэрэр үгэстээх. Сэргэх буол! Дьайҕа буол!
Дойдугуттан туттарыллан,
Сиртэн ситимнэн.
Эллэй эһэбит
Эппитин курдук
Итэҕэллээх буол,
Алампа убайбыт
Баҕарбытын курдук
Кырдьыгы тутус,
Өксөкүлээх Өлөксөй
Үөрэппитин курдук
Үөрэҕи баһылаа!
Туску! Туску! Туску!