Россия киинигэр Москва куоракка «Ассоциация крестьянских хозяйств» XXXIV съеһин делегаттарыгар, Московскай уобалас «БЕССМЕРТНЫЙ ПОЛК» салайааччыта Валерий Олегович Анисимов, олунньу 23 күнүгэр Россия саллааттарын күнүгэр анаан «ПОЗДРАВЬ СОЛДАТА» акция биллэрбитэ. Съезд делегаттара бэйэлэрин регионнарын оҕолоругар аккырыыкка оҥотторон илдьэ кэлэллэригэр тыл көтөхпүт.
Биһиги нэһилиэкпит биир улахан бааһынай хаһаайыстыбатын салайааччыта Анатолий Семенович Бурнашев өрөспүүбүлүкэттэн съезкэ делегат быһыытынан талыллан, Лөгөй орто оскуолатын үөрэнээччилэригэр истиҥ суруктаах аккырыыккалары оҥоруу акцияҕа кыттарга этии киллэрбитэ. Биһиги, акцияҕа кыттарга үөрүүнэн сөбүлэһэн, ис сүрэхтэн истиҥ тыллары суруйбут аккырыыккаларбытын оҥорон тиксэрбиппит. Билигин эйэлээх олох туһугар туруулаһа сылдьар уолаттарбытыгар анаан, күүстэригэр күүс эбиэ, тапталлаах Сахаларын сирин салгына тиийиэ диэн санаалаах эҕэрдэлэрбитин суруйбуппут. Ону Анатолий Семенович илдьэн туттарбыт. Хаартыскаҕа уонна махтал тыллаах видеону уһулан ыыппытын көрөн наһаа үөрдүбүт!
Эҕэрдэ суруктаах аккырыыккаларбыт кыайыы буоларыгар эрэллээхпитин уонна төрөөбүт дойдуларыгар чугас дьоннорун истиҥ ахтылҕаннара түргэнник туолуо диэн эрэнэбит! Саллаакка ис сүрэхтэн тылларбыт көтөн тиийдин, күүстэригэр күүс иҥэрдин!
Дарина Бурнашева, 9 «б» кылаас, Лөгөй орто оскуолата, Уус Алдан.
#кэскиллээхолоххобэлэхбуол