Хас биирдии киһи бэйэтэ тус дьарыктаах. Сорох ол дьарыгар олоҕун аныыр, сорох иллэҥ кэмигэр дьарыктанар.
Биһиги оскуолабыт IX кылааһын үөрэнээччитэ Комила Аржакова үөрэҕин кэнниттэн, иллэҥ кэмигэр ас астыыр дьарыктаах. Комила тарбаҕар дьоҕурдаах. Уруһуйдуур, глинанан дьарыктанар, брошь тигэр.
Ас астыырын оҕо эрдэҕиттэн сөбүлүүр. Бастакы тордун 10 саастааҕар оҥорбут. “Дьонум, аймахтарым сөбүлээбиттэрэ аҕай. Онтон ыла бырааһынньыктарга барытыгар торду мин астыыр буолбутум”, – диэн кэпсиир Комила Аржакова.
Кэнники “сакааска оҥоруоххун сөп дуо?” диэн ыйытыылар киирбиттэр. Нэһилиэк олохтоохторун сакаастарынан, кыра-кыралаан торт астыыр буолан барбыт.
Бастакы торт атыытын кэнниттэн, үлэлээн булбут харчыбын мунньарга санаммытым уонна баҕа санаабын толорон ноутбук, графическай планшет, телефон ылыммытым. Торда суох биир да бырааһынньык буолбат. Онон торт астыыр хаһан да хаалыа суоҕа дии саныыбын, – диэн этэр Комила.
Кини инникитин өссө үөрэнэн минньигэс ас арааһын астыан баҕарар.
Вика БОРИСОВА, VIII кылаас,
А.П. Илларионов аатынан Хайахсыт орто оскуолата, Чурапчы