Мин бу сайыммын туһалаахтык атаараары «Кочевник-2» диэн убайым Марат Слепцов тута сылдьар таба ыстаадатыгар сайылыы тахсыбытым.
Ыстадааҕа үксэ барыта оҕо, эдэр ыччат баар буолан олус интэриэһинэй этэ. Сайын аайы оҕолор бу «Кочевник-2» ыстадааҕа сөбүлээн тахсаллар. Мин бастакыбын 2023 сыллаахха тахсыбытым, онтон сөбүлээммин быйыл иккиспин таҕыстым.
Ыстадааҕа наһаа үчүгэй, айылҕата наһаа кыраһыабай, кэрэ хайалара киһини угуйар. Салгына эчи ырааһын! Ыстаадаҕа сарсыарда 9 чааска турабыт, түүнүн табаларын аҕалан кэллэхтэринэ, таба хаайабыт. Күнүскү табаһыттар маамыкталаан уучах туталларыгар көмөлөһөбүт. Мин эмиэ табаны мэччийэргэ көмөлөспүтүм, уучах миинэрбин сөбүлээбитим. Уонна дьиэ ис-тас үлэтин барытын үлэлиир этим.
Ыстаадаҕа баар дьон бары наһаа үлэһиттэр, күннэрин мээнэ бараабаттар. Нэдиэлэ буола-буола табаларбытын кытары саҥа сирдэргэ көһөрбүт. Онтон сынньалаҥ бириэмэтигэр бары мустан оонньуурбут.
Сайын таба ыстаадатыгар тахсан үлэлиир туохха да тэҥнэммэт дьол. Мин хамнас да ааҕыстым, сайыҥҥы сынньалаҥмын туһалаахтык да атаардым.
Тапталыына Рожина, Кустуур орто оскуолатын 10 кылааһын үөрэнээччитэ,
Эбээн-Бытантай улууһа.
«Биракчаан» медиакиин.
keskil14.ru