Үөрэх дьыла бүппүтүн кэннэ мин сайылыкка Сырдык Уулаах диэн сиргэ баран үлэлээбитим, 24 ньирэйи туппутум. Онно ийэм Раиса Павловна 20 ынаҕы тутан үлэлии сылдьара.
Мин ньирэйдэрбин иккитэ аһатар этим. Сарсыарда 4 чааска туран хомуйан аҕалан баран, уотурба хааһыта сиэтээччибит уонна сэппэрээтэр үүтэ иһээччилэр. Улахан ньирэйдэр хоруудаттан, оттон кыралар суосканан аһыыллара. Ол кэннэ бэйэлэрэ чугастыы Харыйалаахха мэччийэ барааччылар. Күһүөрү Сивцев алааһыгар сылдьыбыттара.
Киэһээ аһылыктара 4 аҥаарга буһар, 5-кэ аһатарбыт. Ынах ыыр мотуор тыаһын иһиттилэр да, ньирэйдэр бэйэлэрэ кэлээччилэр.
Мин икки сөбүлүүр ньирэйдээх этим, Ыҥаачык уонна Николя диэн.
Дьиктитэ диэн биирдэ ньирэйбин хомуйа сылдьан былыргы манньыаты булбутум. Бастаан тимир сытар дии санаабытым, онтон арай ылбытым 1840 сыллааҕы харчы эбит, соһуйбутум аҕай. Улахан дьон кэпсииллэринэн, урут Сырдык Уулаахха баай дьоннор олорбуттар үһү.
Сайылыкка сайын наһаа үчүгэй. Мин иллэҥ кэммэр бэлэсипиэппинэн хатааһылааччыбын. Ийэбиниин уонна ньирэй көрөөччү Александра Васильевналыын сир астыыр этим. Күһүн улахан убайдарым булка илдьэ сылдьыбыттара.
Сайыммын олус туһалаахтык атаарбытым.
rbt
Хаартыскаҕа: Мин эбэбин кытары, 10 уоллаах, 1 кыыстаах Герой Ийэ Унарова Светлана Афанасьевналыын.
Суруйда Равиль ЕРЕМЕЕВ,
Е.А. Степанова аатынан Тоҕус орто оскуолатын 6 кылааһын үөрэнээччитэ,
“Юный краевед” куруһуок иитиллээччитэ,
Бүлүү улууһа, Тыымпы сэл.