Футболга дойду биир бастыҥ кулууба – Москватааҕы «Спартак» анал оскуолата өрөспүүбүлүкэ киин куоратыгар үлэтин саҕалаата. Манна 6-14 саастаах оҕолор «Спартак» оҥорбут методикатынан дьарыктаналлар. Сыл устата кулууп тренердэрэ кинилэри кэтээн көрөллөр. Үчүгэй көрдөрүүлээхтэр салгыы Ф.Ф. Черенков аатынан академияҕа эрчиллэ бараллар.
«Спартак» оскуолата биһиги оҕолорбутугар футбол үрдүк таһымнаах аартыгын арыйар. Сотору кэминэн Саха сириттэн Россияҕа, аан дойдуга биллэр футболистар тахсыахтара. Биһиги, көрөөччүлэр, уолаттарбыт күөх хонууга тыҥааһыннаах киирсиилэрин көтүппэккэ көрүөхпүт уонна күүскэ «ыалдьыахпыт»!
Бүтүн дьиэ кэргэнинэн
Алексеевтар дьиэ кэргэн «Спартак» оонньуутун биири да көтүппэккэ көрөр. Аҕалара Иван 1989 сылга «Спартак» ССРС 12 төгүллээх чемпиона буолуоҕуттан «ыалдьар». Кини сөбүлүүр хамаандатын таҥаһын, саарпыгын мунньар. Уолаттарын – 8 саастаах Дьулуһу уонна 6 саастаах Ваняны кыра эрдэхтэриттэн футболга сыһыарбыт, кэлин «Спартак» оонньооччулара буолуохтара диэн улахан эрэллээх.
– Урут «Юниор» оскуолаҕа дьарыктанар этим. Оттон бу сайын «Спартакка» кэллим. Систиэмэтэ олус ураты, тиэхиньикэҕин ордук эрчийэллэр. Эһиил Дьулус футболга киириэхтээх. Онон «Спартакка» оонньуу сылдьыбыт бырааттыы Комбаровтар курдук буолуохпут. Биһиги Москваҕа стадиоҥҥа, базаҕа, мусуойга сылдьыбыппыт. Ол иһин бу кулууп туһунан элбэҕи билэбин. Быйыл «Спартак» Россияҕа V миэстэҕэ тигистэ. Ол эрээри фанат санаатын түһэрбэккэ, бэйэтин хамаандатыгар бэриниилээҕин көрдөрүөхтээх, ханнык баҕарар үөрүүлээх да, хомолтолоох да түгэннэргэ бииргэ буолуохтаах дии саныыбын, – диэн Ваня кэпсиир.
Сыалым – Москва
Тимур Семенов – Дьокуускайдааҕы классическай гимназия IV кылааһын үөрэнээччитэ. Кини көмпүүтэргэ FIFA 19 оонньоон, футболунан дьарыктанан саҕалаабыт.
– Мин I кылааска футбол сиэксийэтигэр суруйтарбытым. Доҕотторум бары оонньууллар. Гимназиям кыра оҕолорго сүүмэрдэммит хамаандатын хапытаанабын. Бэйэм “полузащитникпын”, ол аата боруотаны көмүскүүбүн, кимэн киириини олохтуубун. Бу оскуолаҕа биир дьарыкка сырыттым. Мин сыалым – Москва. Ол иһин бэйэбин көрдөрүөхпүн наада. Баҕар, туох эмит тахсыа дии.
Саха сириттэн бастакынан…
Стас Гоголев Саха-Корейскай оскуолаҕа VII кылааска үөрэнэр. Кини алын сүһүөххэ сылдьан, дьиэтин олбуорун таһыгар уолаттары кытта мустан, бэйэ- бэйэлэригэр биллиилээх футболистар ааттарын иҥэринэ-иҥэринэ, оонньууллар эбит.
– Доҕотторбун кытта оонньоотохпуна, Роналду буолабын. Кини оонньуутун, тиэхиньикэтин көрөбүн, үөрэтэбин. Бэйэм “Реал Мадрид” кулууп сүгүрүйээччитэбин. Манна сүүһүнэн оҕо кэлэн дьарыктанар. Элбэх оҕону кытары билсэн, бииргэ түмсэн, иллэҥ кэммитин туһалаахтык атаарабыт. Мин Саха сириттэн бастакынан Европаҕа оонньуур кулууптар саамай күүстээх, бастыҥ турнирдарыгар УЕФА чемпионнар лигаларыгар кыттыахпын баҕарабын.
Сайдар кэскиллээх
Оскуоланы арыйыы үөрүүлээх тэрээһинин Россия 6 төгүллээх чемпиона Валерий Кечинов кэлэн киэргэттэ, маастар-кылаас көрдөрдө.
– Россия үгүс куораттарыгар «Спартак» оскуолалара арыллыбыта олус үчүгэй! Манна дьарыктанар усулуобуйа барыта баар. Футбол сахаҕа соччо тарҕамматах оонньуу эбит буоллаҕына, биһиги ол өйдөбүлү төрдүттэн суох гынан эрэбит. Талааннаах, кыахтаах оҕо Москваҕа «Спартак» академиятыгар киирэр. Онтон кэлин, баҕар, Россия сүүмэрдэммит хамаандатыгар оонньуон сөп. Ол иһин төһөнөн элбэх оскуола арыллар даҕаны, соччонон дойдубут футбола сайдар кэскиллээх.
Үс гол баар!
Айсен Варламов – Павловскай орто оскуолатын VIII кылааһын үөрэнээччитэ. «Спартак» оскуолата баарын Инстаграмтан билбит, биллэриини көрөн суруйтарбыт.
– Нэһилиэкпэр спортивнай саала баар. Онно кыраларыттан саҕалаан, бары дьарыктанабыт. Мин футболтан үөрүү-көтүү ылаары уонна кыайаары оонньуубун. Футбол хонуутугар күн ахсын кэлэбин, күн-дьыл туругуттан иҥнибэппин. Дьарыкпыт нэдиэлэҕэ биэстэ буолар. Быйыл улууһум сүүмэрдэммит хамаандатыгар киирбитим. Онно биһиги үксүгэр 4-3-3 эбэтэр 3-5-2 диэн схеманан оонньуубут. Мин “форвардпын”. Быйыл өрөспүүбүлүкэҕэ үһүс буоллубут.
«Спартакка» бастакы дьарыкка наһаа уһуннук сүүрбүппүт, мээчигинэн албынныыр ньымалары үөрэппиппит. Бүтэһиккэ икки хамаандаҕа арахсан оонньообуппут. Онно мин үс голу киллэрбитим. Тренер: «Маладьыас, тохтообокко, умайбакка, киирсэн ис», – диэбитэ.
Ааптар: Павел ИЛЬИН.
Ааптар түһэриилэрэ.