Бүгүн Лөгөй лиссиэйигэр Саха Өрөспүүбүлүкэтин күнүгэр аналлаах линейкаҕа оскуола аактабай саалаҕа толору оҕо муһунна. Тэрээһин Саха сирин өрөгөйүн ырыатын күргүөмүнэн толорууттан саҕаланна. Маҥнайгы кылаас үөрэнээччилэриттэн саҕалаан бары Өрөгөй ырыатын ыллаатыбыт. Лиссиэй бары кылааһын үөрэнээччилэрэ Саха өрөспүүбүлүкэтин, киэн туттар дьонун туһунан видео хоһоонунан эҕэрдэни үөрэ көрдүбүт.
Саха республикатын күнүнэн Лөгөй лиссиэй-интернат үөрэх чааһыгар директоры солбуйааччы Марина Васильевна Петрова бары үөрэнээччилэри, учууталлары эҕэрдэлээтэ. Бүтүн Арассыыйатааҕы «Инникигэ хардыы» конференцияҕа кыайыыларын иһин оскуолабыт быйылгы выпускниктарыгар Алина Ноговицынаҕа, Ваня Колодезниковка уонна лиссиэй 10 А кылааһын үөрэнээччитигэр Антон Тищенкоҕа Бүтүн Арассыыйатааҕы технология олимпиадатын түмүктүүр түһүмэҕин кыттыылааҕар эҕэрдэ суруктары уонна бэлэхтэри туттарда.
Салҕыы бу үөрүүлээх түгэҥҥэ «Оскуола киэн туттуута» бэлиэни уонна ону туоһулуур сибидиэтилистибэлэри МАН корреспондент-чилиэнигэр лиссиэй 9 А кылааһын үөрэнээччитигэр Оксана Пермяковаҕа уонна 10 Б кылаас бастыҥ спортсменыгар, Арассыыйаҕа бокса көрүҥэр маастарга кандидат нуорматын толорбут Тарскай Максимҥа туттардылар. Оҕолору төрөөбүт дойдуларын туһунан Семен Данилов «Сахам сирин таптыыбын» хоһоонунан эҕэрдэлээтилэр лисиэй 6 кылааһын үөрэнээччилэрэ Янис Сысолятин, Володя Игнатьев. Бэһис кылаас коллективын уонна кылаас салайааччыта Анна Михайловна Сысолятина толорууларыгар сахалыы тэтимнээх ырыаҕа аныгылыы флешмоб үҥкүүтүн толордулар, бары мустубут оҕолор тэҥҥэ үҥкүүлэстилэр.
Тэрээһини Сахабыт сирин кунугэр анаммыт оһуохайынан түмүктээтибит. Оһуохайы таһаардылар Ил Дархан гранын кыайыылааҕа Янис Сысолятин уонна «Күн оһуохайа» күрэх номинана Алеша Бурнашев.
Павел Герасимов, Лөгөй лиссиэй-интернат 7 «А» кылааһын үөрэнээччитэ.