Сэмэн Дмитриевич Флегонтов аатынан Хадаар оскуолатын үөрэнээччитэ төрүт көрүҥнэргэ дэгиттэр бухатыыр буоларын көрдөрдө.
Балаҕан ыйын 26 күнүгэр И.Е.Федосеев-Доосо аатынан Дириҥ агро оскуолатыгар Аҕа дойду Улуу сэриитин 80 сыллаах Кыайыытыгар анаммыт XXII «Өбүгэ оонньуулара» национальнай көрүҥнэр фестивалыгар улуустааҕы сүүмэрдиир күрэхтэһии бастакы түһүмэҕэ ситиһиилээхтик буолан ааста. 9-10 кылаас (2009-2010 сс. төрүөх) уонна 11-с кылаас (2008 с.т.) үөрэнээччилэрэ илин-кэлин түһүстүлэр.
Күрэхтэһиигэ Сэмэн Дмитриевич Флегонтов аатынан Хадаар орто оскуолатын 11-с кылааһын үөрэнээччитэ Вова Герасимов дэгиттэр уратытын көрдөрөн, түөрт сүрүн көрүҥҥэ кыттан, күүстээх киирсии түмүгэр, биир эрэ баалынан хаалан, 2-с миэстэ буолла. Бу – хорсун дьулуур уонна уостубат санаа көстүүтэ.
Вова бэйэтин күрэхтэһиитин туһунан маннык кэпсиир:
Кыһыыта сүрдээх этэ! Биһиги 11-с кылаастартан уопсайа алта буолан кыттыбыппыт. Хайдах да гыммытым иһин, биир эрэ баал тиийбэккэ 2-с миэстэ буоллум. Ордук кыһыыта диэн тутум эргииргэ хаҥас өттүбэр эргийэн иһэн сыыстым. Онон, эһиил ити күрэххэ кыттар уолаттарга сүбэлиэм этэ: дарыгы олох көтүппэккэ, тренер Петр Петровиһы болҕойон истэн, утумнаахтык дьарыктанын.
Вова Герасимов күрэхтэһиитин ырытан көрөр буоллахха маннык:
Бастакынан, ыстаҥа. Вова бэйэтин бастыҥын көрдөрөн, 11,47 миэтэрэни ыстанан, кыайыылаах тахсан, күрэхтэһиини күүскэ саҕалаата.
Иккиһинэн, тутум эргиир. Уустук, бөҕө-таҕа буолууну ирдиир саха төрүт көрүҥэр Вова 27-тэ эргийэн, 4-с миэстэ буолла. Бэйэтэ да этэринэн, хаҥас өттүгэр эргийэригэр сыыһа тутан кэбистэ.
Үсүһүнэн, мас тардыһыы. Аан дойдуга биллибит көрүҥҥэ Вова тэҥнээҕи булбатаҕа. Күүһүн, кыаҕын көрдөрөн, бастакы буолары ситистэ.
Төрдүһүнэн, хапсаҕай. Түмүктүүр, кылысхай хамсаныылаах хапсаҕай көрүҥэр Вова дүүлүктээхтик тустан, кыайыыга чугаһынан да буоллар, 2-с миэстэнэн муҥурданна.
***
Күрэхтэһии программатыгар «Бэйэни билиһиннэрии», «Кириэс тэбии», «Хаамыска, хабылык» курдук эмиэ киирбиттэрэ оҕолор араас дьоҕурдарын толору көрдөрөллөрүгэр улахани кыаҕы биэрдэ.
Вова Герасимов ситиһиитэ – барыбытыгар холобур! Кини күүһэ-уоҕа, араас көрүҥнэргэ дэгиттэр буолара, дьулуурдаах майгыта – дьиҥнээх патриот оҕотун көрдөрөр. Онон, Саха сирин эдэр ыччата спорт төрүт көрүҥнэринэн дьарыктанан, чэгиэн олоҕу тутуһарын, төрөөбүт дойдутугар тапталын көрдөрөрүнэн киэн туттабыт.
Воваҕа инникитин үөрэҕэр бастыҥ ситиһиилэри, спорт эйгэтигэр өссө үрдүк чыпчааллары баҕарабыт. Кини кэскилэ сырдык буоллун, сахалыы күүс-уох уостубатын!
Аристарх ЛУКИН, Х кылаас,
С.Д. Флегонтов аатынан Хадаар орто оскуолата, Чурапчы
Г.Н. Бандерова хаартыскалара