Саха Өрөспүүбүлүкэтигэр биллэриллибит Ийэ сылыгар анаан Чурапчы улууһун Т.М. Каженкин аатынан Арыылаах орто оскуолатын V кылааһын үөрэнээччилэрэ Ийэ туһунан суруйбут хоһооннорун ыыталлар.
Ийэ
Аан дойдуга кэрэ,
Саамай сырдык, эйэҕэс
Мин күммүн киэргэтэр
Ийэм эйэҕэс мичээрэ.
Кини сылаас, сымнаҕас
Имигэсчэй илиитэ
Миигин таптаан оргууйдук
Имэрийэн утутар.
Сарсыардаттан эрдэлээн
Минньигэстэн минньигэс
Итии чэйэ, алаадьыта
Үөрэхпэр алҕаан атаарар.
Виолетта Прокопьева,
Т.М. Каженкин аатынан Арыылаах орто оскуолатын V кылааһын үөрэнээччитэ,
Чурапчы улууһа.
ххх
Мин ийэм мин туспар кыһаллар,
Ийэм баар буолан күн сирин көрбүтүм.
Сахалыы саҥарар буоламмын,
Ийэбин ийэ диэн ыҥырабын.
Мин ийэм күн курдук
Сып-сырдык санаалаах,
Эдэркээн бэйэлээх, эйэҕэс мичээрдээх.
Ийэбин таптыыбын, дьоллоохтук сананабын.
Тоня Харитонова,
Т.М. Каженкин аатынан Арыылаах орто оскуолатын V кылааһын үөрэнээччитэ,
Чурапчы улууһа.
***
Тэйэ сылдьан ахтабын
Ийэм, минньигэс сыккын
Санаан, дууһам манньыйда,
Мичилийэр мичээргин
Ахтан сүрэҕим долгуйда.
Ийэм ып-ыраас дьиэтэ,
Куруук сылаас аһа,
Сырдык уоттаах түннүгэ
Миигин күүтэн эрдэҕэ.
Ыраах сылдьан саныыбын,
Ийэбин олус таптыыбын,
Үрүҥ күҥҥэ тэҥниибин,
Көрсөр күммүн күүтэбин.
Сандаара Демьянова,
Т.М. Каженкин аатынан Арыылаах орто оскуолатын V кылааһын үөрэнээччитэ,
Чурапчы улууһа.
keskil14.ru