Оҕо суруйааччыта Мусьяна Сосина Баатаратааҕы «Кэскил» оҕо саадын уһуйааччытынан үлэлиир. Кини «Мин дьыссааппын таптыыбын» диэн кинигэ, «Сэттэ өҥнөөх кустугум» хомуурунньук ааптара. Элбэх хоһоонноро «Чуораанчык» оҕо сурунаалыгар бэчээттэнэн тахсыбыттара.
Үгүс оҕо таптаан ааҕар, үөрэтэр хоһооннорун айан таһаарар талааннаах уонна кэскиллээх биһиги кэммит суруйааччыта Мусьяна Сосина Амма Аччыгыйа аатынан «Кэскил» оҕо бэчээтин кыһатын кытары өрүү бииргэ үлэлэһэр үтүө доҕорбут.
Мусьяна Сосина идэтинэн уһуйааччы буолан оҕолорго анаан дорҕооннор, буукубалар тустарынан үөрэтэр, оҕо тылын-өһүн сайыннарар хоһооннордоох. Олортон бүгүн «Дифтоннар» диэн хоһоону таһаарабыт. Оҕолоргутун кытары бииргэ ааҕыҥ, оҕо чуолкайдык саҥарарын кэтээн көрүҥ, хоһооннору өйтөн үөрэтиҥ.
Дифтоннар
Мусьяна СОСИНА
ЫА
Ыаҕыйабын ыламмын,
Ыллык суолу батыһыам.
Ырыа-тойук аргыстаах
Тыалы кытта ыллаһыам.
ИЭ
Биэ үүтүн испит оҕо
Иэдэстэрэ тэтэркэй,
Биэбэр эбиэс бэрсиэҕим
Сиэлин имэрийиэҕим.
УО
Уон саастаах Уоһук уол
Суон уоһа чорбоҥнуур,
Соккуойун сиэбэтэх,
Суоратын испэтэх.
ҮӨ
Үөткэ үөнү көрөммүн
Үөрэ, үөрэ үөмэбин,
Күөх үөнү үөттэн ылыам
Доҕотторбор көрдөрүөм.
2022 с.
Мусьяна Сосина Инстаграм ситимигэр айар үлэтин көрдөрөр аккауна @musyana1975.