Оҕолоор, халлааҥҥа туолбут ыйы, бачымах курдук сулустары көрөргүтүн сөбүлүүгүт дуо? Бука, Хамыйах сулуһу, Халлаан уолун хайыһарын суолун ыйан көрдөрөр буолуохтааххыт. Оттон сахалартан бастакы астроном кимин билэҕит дуо?
Үөһээ Бүлүү Харбалааҕар Евгения уонна Харлампий Муксуновтар дьиэ кэргэттэригэр үһүс оҕонон Иван төрөөбүтэ. Иван Харлампьевич Муксунов Үөһээ Бүлүүгэ ССРС норуодунай учууталыгар Михаил Андреевич Алексеевка үөрэммитэ. Үөрэҕэр уһулуччу буолан, үгүс олимпиадаларга ситиһиилээхтик кыттара. Кылааһын алта уолун кытта Москуба судаарыстыбаннай университетыгар туттарсан, физическэй факультекка үөрэммитэ. П.К. Штернберг аатынан Астрономическай институт дипломнаах дойдутугар эргиллибитэ. Саха судаарыстыбаннай университетыгар Сир искусственнай спутнигын кэтээн көрөр станцияҕа сүрүннүүр лаборанынан үлэтин саҕалаабыта. Отучча сыл физика үөрэҕин сэргэ астрономия тиэмэтигэр устудьуоннарга лиэксийэ аахпыта. Маны таһынан оҕолорго аналлаах астрономияҕа аан бастакы өрөспүүбүлүкэ таһымнаах олимпиаданы тэрийсибитэ. Кини “Халлаан” уонна “Сулус” диэн компьютернай бырагыраама оҥорбута. Ити үлэтин күн бүгүҥҥэ диэри М.К. Аммосов аатынан ХИФУ устудьуоннара тутталлар, оҕолор астрономия олимпиадатыгар бэлэмнэнэллэр.
Иван Харлампьевич Муксунов аатынан аудитория үлэлээбит сиригэр ХИФУ-га баар. Кини оҥорбут бырагырааматынан үгүс устудьуон лабораторнай үлэ оҥороллор диэн физика методикатын кафедратын сүрүннүүр преподавателэ Айталина Анатольевна Протодьяконова кэпсээтэ. Уонна бу аудитория хаартыскатын, Иван Харлампьевич үлэлэрин, астрономияҕа бырагырааматын ыытта.
Оттон төрөөбүт-үөскээбит Харбалааҕар, үөрэммит оскуолатыгар физика учуутала, СӨ үөрэҕириитин туйгуна Николаев Виктор Кириллович этиитинэн, кини аатынан олимпиадаларга ситиһиилээх оҕолорго анаан стипендия баар.
Куйаар дьикти кистэлэҥнэрин, сулустар хаамыыларын үөрэппит саха бастакы астронома Үөһээ Бүлүү Харбалаах нэһилиэгиттэн төрүттээх Иван Харлампьевич Муксунов. Сахаларга даҕаны сэдэх идэлээх дьон баар эбит.
Евдокия Павловна Семенова,
И.Н. Барахов аатынан СӨ судаарыстыбаннаһын
түмэлин үлэһитэ.
keskil14.ru