Тыйыс тымныылаах эрээри, тулуурдаах сүрэхтээх, үлэһит дьоннорунан биллэр Эбээн-Бытантай национальный улууһун Аллараа-Бытантай нэһилиэгин Кустуур бөһүөлэгэр таба иитиитигэр күннэтэ сүҥкэн кылаатын киллэрэр, туруу үлэһит быһыытынан оройуоҥҥа биллэр, талааннаах эдэр ыччаттартан биирдэстэрэ Айаана Слепцова буолар.
Айаана 2005 сыллаахха Владимир уонна Анна Слепцовтар дьиэ кэргэттэригэр маҥнайгы оҕонон күн сирин көрөн ийэ уонна аҕа буолар дьолу бэлэхтээбитэ. Владимир уонна Анна олохторун таба иитиитигэр анаабыт дьон, онон улууспутугар биир тарбахха баттанар ыстаада чулуу үлэһиттэрэ буолаллар. Айаананы кыра эрдэҕиттэн таба иитиитигэр чугаһатан, кыыстара номнуо 25 сааһын томточчу туолан, дьонун туйаҕын хатаран, сыллата ыстаадаҕа үлэлээн дьонун үөрдэр. Дьэ, кырдьык, ыстаада олоҕо олус диэн ыарахан буоллаҕа, тохсунньу томороон тымныыларын бопсубакка, биир да өрөбүлэ суох, күннэтэ түүннэри-күнүстэри үлэлэрэ күөстүү оргуйар.
Биһиги кэрэспэдьиэннэрбит Айаана Слепцованы кытары, ыраах туруук таастаах хайалар быыстарыгар үлэлиир диэбэккэ, куйаар ситиминэн ыйытыктарбытын биэрдибит:
— Айаана, дорообо, ыстаадаҕа эн хас сааскыттан сылдьаҕыный?
— Ыстаадаҕа оҕо эрдэхпиттэн, эппиккэ дылы, бэйэбин өйдүөхпүттэн сылдьабын.
— Дьиэ кэргэниҥ туһунан сырдатыаҥ дуо?
— Аҕам Слепцов Владимир Мопрович, ийэм Слепцова Анна Ивановна уонна муннубут бүөтэ — кыра балтыбыт Татьяна Слепцова. Биһиги бары олохпутун ыстаадаҕа анаабыт дьон буолабыт. Бары таба иитиитигэр, таба көрөөһүнүгэр, табаны да сүүрдүүгэ сырабытын уурбут дьон буолабыт.
— Биллэн турар, ыстаада олоҕо ыарахаттардаах буоллаҕа, онтон эн тугу сүрүннээн этиэҥ этэй?
— Ыстаадаҕа олоҕо ыарахан да буоллар, олус диэн интириэһинэй, холобура, сибиэһэй салгын, ыраас дьэҥкир үрэх уута, тула өттө үрдүк халлааны дабайар хайалар, биир тылынан эттэххэ, кэрэ айылҕа! Аны туран бэйэ аһа, мантан ордук туох үчүгэй баар буолуой?! Онтон ыарахаттар диир буоллахха, көлө аҕыйаҕа, ону таһынан куйаар ситимэ, сибээс мөлтөҕө буолар дии саныыбын.
— Ыччакка баҕа санааҥ.
— Ыстаадаҕа сылдьыҥ, сайыҥҥытын атаарыҥ, ыстаадаҕа киһи элбэххэ үөрэнэр, элбэҕи билэр.
Айаана бөһүөлэккэ киирдэҕинэ, нэһилиэк уопсастыбаннай олоҕор олус көхтөөх, сыанаттан түспэт артыыс уонна кэнсиэри ыытааччы.
Сахабыт сирин үрдүнэн эдэр үлэһит дьон элбии турдуннар диэн баҕа санаалаахпын.
Наум НАУМОВ,
Кустуур орто оскуолатын 11 кылааһын үөрэнээччитэ, «Биракчаан» медиакиин.
keskil14.ru