Билиҥҥи олохпутугар биир сытыытык турар кыһалҕабыт — саха тыла, төрөөбүт төрүт тылбыт, сүтэр, мөлтүүр куттала. Бэс ыйын 4 күнүгэр «Ийэ тыл» уопсастыбаннай хамсааһын уонна өрөспүүбүлэкэтээҕи лицей — интэринээт дириэктэрин Иван Иванович Шамаев көҕүлээһининэн мунньах буолан ааста.
Пленарнай чааска Жирков Е.П., Шамаев И.И., Михалева Н.В. — Сайа, Никитина В.Н., Шишигина Ф.В., Барашкова Ж.Ф., Ноева С.Е., Кириллина М.А., Гуринов А — Арчылан, Ньургун Бэчигэн, Осипов Дь.Р. уо.д.а баҕалаах дьон тыл эппиттэрэ.
Салгыы 6 секцияларынан үлэ барбыта. Икки кэрэспэдьиэн «Саха тылын уонна литературатын үөрэтиини оҕоҕо тиийимтиэ оҥоруу» диэн секцияҕа үлэлээтибит. Саха тылын уонна учууталларын ассоцияциятын бэрэссэдээтэлэ Жанна Федоровна Барашкова салайда. «Кырдьаҕаһы хааһахха укта сылдьан сүбэлэт» диэн өс хоһооҥҥо этиллэринии, үлэ бэтэрээннэрэ Гаврил Иннокентьевич Адамов, Дмитрий Иванович Винокуров — Чаҕаан, Салайа Иннокентьевна Софронова уонна саха тылын, литературатын учууталлара санааларын кытта үллэһиннилэр. Уонна эдэр ыччат илгийэр санаатын М.К.Аммосов аатынан ХИФУ ХИНТуоКИ 2 куурус устудьуона Сибэкки Заровняева эттэ.
«Улуу нуучча норуотун кынатын күлүгэр олорон бэйэбит уратыбытын баттаатыбыт. Саха киһитэ сарсыҥҥытын туһугар долгуйуохтаах. Хас биирдиибит норуоппут симэлийбэтин туһугар, саатар төрөөбүт тылын, суругун-бичигин күннээҕи олоххо туттарынан даҕаны бэйэтин кылаатын киллэриэхтээх», — диэн бэргэн этии этилиннэ.
Билиҥҥи оҕо атын. Күн аайы наһаа элбэх информацияны иҥэринэр. Ол курдук, кини саха тылын, литературатын учебниктарын үөрэтэрэ, ылынара ыараата, интэриэһэ сүттэ. Аныгы сайдыы тосхоло — социальнай ситим содула күүстээх. Оҕолор, улахан да дьон нуучча тылы кыбытан саҥарарбыт үксээтэ. Ол эрээри, манна оҕону, эбэтэр кими эрэ атыны буруйдуур, мөҕөр сатаммат, олохпут оннук устан кэллэҕэ. Тулалыыр эйгэбитин көрүҥ: нууччалыы кинигэ, хаһыат, ТВ биэриилэр, киинэлэр. Бу барыта, хомойуох иһин, саха култууратын барытын баһыйар. Билиҥҥи үйэҕэ үгүс сахаларга нуучча тыла иккис төрөөбүт тыл курдук буолла. Сорохтор, бэл, нууччалыы толкуйдуур, сахалыы айымньылары аахпат, сахалыы суруйбат буоллулар.
Саамай сүрүн иитииннэн, мунньах кыттыылааҕын быһыытынан санаабын эттэхпинэ, оҕо, улахан да киһи «мин сахабын» диэн кыбыстыбакка киэн тутта этиэхтээх, сахалыы айымньылары ааҕыахтаах, төрөөбүт тылынан саҥарыахтаах, кэпсэтиэхтээх. Киһи бэйэтиттэн, кыраттан саҕалыан наада. Уонна аныгы үйэ литературата мөлтөх. Билиҥҥи олоҕу көрдөрөр, ойуулуур, сэмэлиир, хайгыыр сахалыы айымньылар тоҕо суохтарый?
Мунньах түмүгүнэн Жанна Федоровна санаатын үллэстэр: «Өр кэмнээх хаайтарыы кэнниттэн бастакы улахан илэ түмсүү буолла. Дьон санаата чаҕылхай, өрө күүрүүлээх, ийэ тылбыт туһугар ис сүрэхтэн ыалдьар, биир санаалаах дьон көрсүһэн, кэпсэтэн аастыбыт. Тылбыт бүгүҥҥү туругар киһини дьиксиннэрэр төрүөтүнэн кыра оҕолор нууччалыы саҥаран тылланаллара, онно төрөппүт сороҕор төһүү буолара хомолтолоох. Иккиһинэн, саха тылын оскуолаҕа үөрэтии хайдах тэриллиэхтээҕэ өссө да быһаарылла илик. Бу эмиэ киһини дьиксиннэрэр.
Маннык көҥүл түмсүүлэр, тэрээһиннэр, мунньахтар, биир санаалаах дьон баар буоланнар, Тылбыт, Омукпут, Саха сирин туһугар бары эйгэҕэ туруулаһыы, көмүскээһин, дьоҥҥо-сэргэҕэ өйдөтүү үлэтэ ыытыллар.Саха дьоно бука бары Ийэ Тылбыт туһугар турунуоҕуҥ, инники олохпут, дьылҕабыт барыта онтон тутулуктаах.»
Биһиги төрөөбүт тылбыт – өлбөт – сүппэт барҕа баайбыт, норуот быһыытынан дьикти күүспүт, киэн туттуубут. Норуот төрөөбүт тылынан кэпсэтэр, билэр эрэ буоллаҕына, көлүөнэттэн көлүөнэҕэ бэриллэн үйэтийэр. Улуу да, кыра да норуот, ийэ тыллаах буолан күүстээх, муударай уонна кэскиллээх буолар.
Эльдар Садовников