Ил Дархан Айсен Николаев сэтинньи 25-26 күннэригэр Дьокуускайга III өрөспүүбүлүкэтээҕи саха тылын уонна учууталларын сийиэһэ ыытылларын бигэргэттэ. Сийиэһи тэрийэр кэмитиэт салайааччытынан Бырабыыталыстыба Бэрэссэдээтэлин солбуйааччы Сергей Местников ананна. Быйылгы көрсүһүү Алексей Елисеевич Кулаковскай бастакы саха тылынан суруйбут айымньытын 125 сылыгар уонна саха литературатын уус-уран паамытынньыгын суруйбут Афанасий Яковлевич Уваровскай төрөөбүтүн 225 сылын көрсө тэрийиллиэ.
Сийиэс сүрүн сыала – Саха Өрөспүүбүлүкэтигэр саха тылын сайыннарыы, литератураны уонна култуураны үөрэтии ньыматын, идэлээх дьону бэлэмнээһини тупсарыы туһунан кэпсэтиини тэрийии, кэскиллээх суолу тобулуу.
Сийиэскэ өрөспүүбүлүкэ бары улуустарыттан, Дьокуускай куораттан уопсайа 450 тахса дэлэгээт кыттыахтара. Ону тэҥэ ыҥырыылаах ыалдьыттар, тыл экспиэрдэрэ кэлэллэрэ былааннанар. Бүрээт Өрөспүүбүлүкэтиттэн бүтүн Арассыыйатааҕы «Төрөөбүт тыл уонна төрөөбүт литература бастыҥ учуутала – 2024» күрэхтэһии кыайыылааҕа , Улан Удэтээҕи национальнай лиссиэй-интэринээт учуутала Светлана Раданжапова, Калмыкия Өрөспүүбүлүкэтиттэн Элиста куорат 24 №-дээх уһуйаанын эбии үөрэхтээһинин педагога, «Төрөөбүт тыл уонна төрөөбүт литература бастыҥ учуутала – 2024» Бүтүн Арассыыйатааҕы күрэх призера, Екатерина Балакаева кэлэллэрэ күүтүллэр.
Сийиэс чэрчитинэн сүрүн көтөҕүллэр боппуруостар:
- Саха тылын, төрөөбүт култуурабытын бөҕөргөтүү;
- Научнай-чинчийэр хайысханы оскуолаҕа тупсарыы;
- Сахалыы үөрэтии-иитии мэтиэдьикэтин түмүктэрин көрүү, саҥа чинчийиилэри арыйыы;
- Идэҕэ бэлэмниир үөрэх тэрилтэлэригэр саха тылын, литературатын уонна култууратын үөрэтэр усулуобуйаны тупсарыы;
- Олоҥхо педагогигатын олоххо киллэрии көдьүүһэ;
- Оҕоҕо эйгэни тэрийии уратыта (таһымнарынан) (уһуйаан, алын сүһүөх, орто сүһүөх о.д.а);
- Сахалар түөлбэлээн олорор нэһилиэктэригэр төрөөбүт тылынан иитии-үөрэтии ;
- Дьокуускай куоракка төрөөбүт тылынан иитии-үөрэтии;
- Эбии үөрэх тэрилтэлэригэр сахалыы иитии-үөрэтии;
- Учуобунньук тутулугар үлэни ыытыы, кэпсэтии
- Төрөппүтү кытта үлэни тэрийии
Сийиэс бырагыраамматын кытары съездучителей14.рф сигэнэн билсэн, регистрация ааһаргытын ыҥырабыт. Таһаарыылаах үлэ, саргылаах кэпсэтии тахсарын күүтэбит.
keskil14.ru