«Саха тыйаатырын сүгүрүйээччилэригэр, искусствоны сэҥээрээччилэргэ уонна ордук ыччакка болҕомтону уурар сыалтан «Тыл – литература – тыйаатыр» тиhигинэн аhаҕас лиэксийэлэри, кэпсэтии түhүлгэлэрин, «төгүрүк остуоллары» тэрийэр буолуохпут», — диэн былааннарын Саха тыйаатырын дириэктэрин солбуйааччы Геннадий Охлопков билиhиннэрэр.
Ол курдук, кулун тутар 11 күнүгэр, «Маарыкчаан ыччаттара» искпэктээкил сүрэхтэниитин иннигэр суруйааччы, саха литературатыгар маҥнайгынан роман жанрын киллэрбит, гражданскай сэрии кыттыылааҕа Семен Яковлев – Эрилик Эристиин айар үлэтин уратытын, айымньыларын суолтатын уонна кинини саха суруйааччылара, литературоведтара хайдах курдук үрдүктүк сыаналыылларын туhунан истиҥ кэпсээни филологическай наука доктора, М.К. Аммосов аатынан ХИФУ профессора, СӨ наукатын үтүөлээх үлэһитэ Варвара Окорокова оҥордо.
Премьера иккис күнүгэр, кулун тутар 12-гэр көрөөччүлэргэ анаан Эрилик Эристиин биир дойдулааҕа, саха тылын уонна литературатын учуутала Мария Филиппова уонна очеркист-прозаик, историческай наука кандидата Владимир Пестерев ыалдьыттаатылар. Кинилэр ордук суруйааччы дьылҕатын, суруйааччы үүнэн-сайдан тахсыытыгар төрөөбүт түөлбэ сабыдыалын, гражданскай сэрии, оччотооҕу кэм утарсыылаах дьалхааннарын туһунан сэһэргээтилэр.
Тэрээһин кыттыылаахтарын, Саха тыйаатырын көрөөччүлэрин режиссер Сергей Потапов премьера күнүнэн эҕэрдэлээн туран, «Маарыкчаан ыччаттара» бөдөҥ айымньы буоларын быһыытынан, испэктээкил салгыытын таһаарар баҕалааҕын туһунан билиһиннэрдэ. «Салгыы үлэлииргэ баҕа диэн кыра, бастатан туран, бар дьон сэҥээриитин ыларбыт наада», — диэн чопчулаата режиссер.
Түмүккэ, Эрилик Эристиин биир дойдулаахтара, чуолаан Чакыр нэһилиэгин баһылыга Константин Лебедев салалталаах делегация, суруйааччы сиэнэ, Аксения уонна Наталья Посельскаялар ааттарынан Дьокуускайдааҕы хореографическай кэллиэс дириэктэрэ Дария Дмитриева тыйаатыр салалтатыгар, литературовед В.Б.Окороковаҕа Эрилик Эристиин сырдык аатын үйэтитиигэ дьоһуннаах үлэлэрин иһин махтаннылар. М.К. Аммосов аатынан Хотугулуу-Илиҥҥи федеральнай университет выпускниктара учууталларын М.Е. Филиппова лиэксийэтин дуоһуйа истэн, ахтылҕаннарын биллэрэн, сибэкки дьөрбөтүн туттардылар.
П.А. Ойуунускай аатынан
Саха академическай тыйаатырын
пресс-сулууспата.