Саха сирин «Полярные волки» хоккейнай хамаандата юниордар икки ардыларыгар бастыыр иһин суперлигаҕа кыайыыны ситистэ.
Күрэхтэһии сэтинньи 27-29 күннэригэр Новосибирскай куоракка 2010 сыллаах төрүөх оҕолор хамаандаларын иһигэр ыытылынна. Манна Иркутскай, Чита, Мииринэй, Новосибирскай уонна Саха сириттэн «Полярные волки» юниордар хамаандалара күөн көрүстүлэр.
«Турнир круговой систиэмэнэн ыытылынна. Уопсайа күрэхтэһиигэ алта хамаанда кытынна. Күрэхтэһии түмүгүнэн „Полярные волки” кыайыылаах таҕыста», — диэн хамаанда тренерэ Яков Сандаков иһитиннэрдэ.
Кини этэринэн, эдэр хоккеистар 2022 сылга тохсунньу саҕаланыытыгар ыытыллар Арассыыйа бастыыр иһин күрэхтэһиитигэр (Сибиир-Уһук Илин эрэгийиэннэргэ) кыттарга бэлэмнэнэллэр.