Хаҥалас улууһун М.Е. Васильева аатынан 2 Малдьаҕар орто оскуолатын 11 кылааһын туйгун үөрэнээччитэ Сережа Павлов быйыл Саха сирин баһылыгын харыйатыгар кыттар үрдүк чиэскэ тигистэ.
Сережа үөрэх бастыҥа, научнай-чинчийэр үлэнэн дьарыктанар. Ол курдук «Назаровскай ааҕыыларга» лауреат, «Школа юного исследователя», «Афанасьевскай ааҕыыларга» 1 миэстэни ылбыта.
Сережа учуутал буолар баҕалаах, ол курдук WorldSkills Juniors чемпионакка «Преподавание в младших классах» компетенцияҕа ситиһиилээхтик кыттан, 2 миэстэни ылбыта.
Маны тэҥэ кини ыллыырын сөбүлүүр. «Сардаҥалаах Аартык», «Малдьаҕар сулустара», «Көмүс дорҕоон», «Ярче всех» конкурстарга лауреат аатын ылан турар.
«Саха КВН» улуустааҕы күрэҕэр «Мистер КВН» номинациянан наҕараадаламмыта. «Верный сын своего народа» викторинаҕа 2 миэстэ, «Ийэ тыл этигэн кэрэтэ» улуустааҕы бэстибээлгэ хоһоон этэн 3 миэстэ буолбута.
Сережа оскуолатааҕы медиакииҥҥэ эдэр кэрэспэдьиэн быһыытынан дьарыктанар. 2019 с. «Сэрии оҕолоро», 2021 с. «Билии, сайдыы сарыала» кинигэлэр тахсалларыгар үлэлэспитэ. 2023 с. «Үлэ киһини киэргэтэр» диэн тыа хаһаайыстыбатын эйгэтин үлэһиттэрин туһунан кинигэ үлэтигэр көмөлөстө. Кэскил.ру сайтка тэттик сонуннары, заметкалары суруйар, видеороликтарга уһуллар. Оскуола тэрээһиннэригэр ыытааччы буолан көхтөөхтүк кыттар, баһаатай быһыытынан алын кылаас учууталларыгар көмөлөһөр. Иллэҥ кэмигэр торт астыырын сөбүлүүр.
Сережаҕа сөбүлүүр үөрэҕэр туттарсан, үтүө үлэһит буоларыгар баҕарабыт.
2 Мальдаҕар орто оскуолатын медиакиинэ