Бүгүн Дьокуускай куоракка норуоттар икки ардыларынааҕы онлайн кэнпириэнсийэ саҕаланна. Национальнай бэчээт сайдыытын саҕахтарын уонна инники кэскилин, өйөбүлүн суруналыыстар, чинчийээччилэр, тустаах экспердэр хас даҕаны туспа тиэмэлээх салааҕа арахсан үлэлээтилэр.
«Пресса на национальных языках: становление и развитие» салааны СӨ духуобунас академиятын чилиэнэ, суруналыыс, Хотугулуу-Илиҥҥи федеральнай үнүбэрсиэт тыл салаатын суруналыыстыка кафедратын сэбидиссэйэ Олег Сидоров иилээн-саҕалаан ыытар.
Саха сиригэр маассабай иһитиннэрэр-биллэрэр сириэстибэлэргэ судаарыстыбаннай тылы харыстааһын уонна өйөбүл туһунан СӨ инновациятын, цифровой сайдыытын уонна инфокоммуникационнай технологиятын миниистирин солбуйааччыта Георгий Андреев иһитиннэрдэ. Кини сүрүннээн СӨ бөдөҥ судаарыстыбаннай бэчээт уонна көрдөрөр-иһитиннэрэр тэрилтэлэрин: «Саха» НКИК, «Айар» национальнай кинигэ кыһата, «Сахабэчээт» , «Кэскил» оҕо бэчээтин кыһата төрөөбүт тылы харыстааһыҥҥа, киэҥ араҥаҕа тарҕатар, сайыннарар, сырдатар үлэлэригэр болҕомтону уурда.
Маны таһынан, миниистир солбуйааччыта Георгий Андреев үөрүүлээх сонуну иһитиннэрдэ, ол курдук 2022-2024 сс. судаарыстыбаннай бырайыак чэрчитинэн үүнэр сылга Сахабыт сиригэр оҕо тэлэбиидэнньийэтэ олоххо киирэригэр 40 мөл. солк. суумалаах үп көрүллүбүт. Бу «Саха» НКИК иһинэн тэриллэр төрөөбүт тылы оҕоҕо кыра сааһыттан иҥэрэр, үөрэтэр сыаллаах улахан бырайыак буоларын эттэ.
Билигин судаарыстыбаннай политика ыытар сүрүн соруктара сударыыстыбаннай тылы харыстааһыҥҥа уонна тарҕатыыга олоҕурар. Онно төрөөбүт тылынан, чуолаан сахалыы тыллаах оҕоҕо аналлаах тэлэбиидэнньийэ канаала олоххо киирэрэ бу үүнэр көлүөнэҕэ кэскиллээх уонна улахан суолталаах саҕалааһын буолар.
keskil14.ru