Ил Дархан Айсен Николаевка Москва куоракка «Саамай ааҕар эрэгийиэн» Бүтүн Арассыыйатааҕы куонкурус түмүгүнэн биһиги Сахабыт сиригэр «Кинигэ уонна ааҕыы эйгэтин территорията» бочуоттаах анал аат бэлиэтин туттардылар. Ол туһунан СӨ Бырабыыталыстыбатын уонна баһылыгын дьаһалтатын пресс-сулууспата иһитиннэрэр.
Наҕарааданы Россия бэрэсидьиэнин култуура боппуруостарыгар сүбэһитэ, нуучча тылын уонна литературатын преподавателлэрин Аан дойдутааҕы ассоциациятын бэрэсидьиэнэ Владимир Толстой туттарда.
Үөрүүлээх быһыыга-майгыга Арассыыйа кинигэтин сойууһун бэрэсидьиэнэ, судаарыстыбаннай уонна политический деятель Сергей Степашин кыттыыны ылла.
«Кинигэ уонна ааҕыы эйгэтин территорията» 2019 сыллаахха олоххо киирбитэ. Бу «Саамай ааҕар эрэгийиэн» күрэс кыайыылааҕынан буолбут, кэнники биэс сылга испииһэккэ үстэ киирбит эрэгийиэҥҥэ туттарыллар. 2019 сыллаахха Санкт-Петербург уонна Ульяновскай уобалас кыайыылаахтарынан буолбуттара. 2020 сыллаахха Ульяновскай иккис төгүлүн үрдүк бэлиэни ылан турар. Быйыл дьүүллүүр сүбэ Саха сиригэр туттарарга быһаарда.
«Биһиги «Ааҕар Арктика» бырайыагы өйүүр куонкурус тэрийээччилэригэр махтанабыт. Бу аахсыйаҕа саха Арктикатыгар олорор нэһилиэнньэ үс гыммыт биириттэн ордуга хабылынна. Викториналары, куонкурустары ыытыы, үөрэх уонна сырдатар тэрээһиннэри таһынан, бастатан туран, Саха сирин төрүт норуоттарын тылларын тарҕатыыга улахан үлэ ыытыллар», — диэтэ Айсен Николаев.