Куонкурус түмүктүүр түһүмэҕэр киирбит хомусчуттар билиэт тардан ылан, чуо ол тиэмэҕэ тута хомуһунан дьүһүйдүлэр. Холобур, Башкортостан өрөспүүбүлүкэтин үтүөлээх үлэһитэ, З. Исмагилов аатынан искусство Судаарыстыбаннай институтун төрүт муусуканы толорууга уонна этномузыкологияҕа кафедратын доцена Артур Гайсаровка «Ардах үҥкүүтэ» диэн тиэмэ түбэстэ.
— Башкирдар хомуһу «кубыз» дииллэр. Өссө «хурай» диэн төрүт үнүстүрүмүөҥҥэ эмиэ оонньуубун, устудьуоннары үөрэтэбин. Кубызка эбэбиттэн, оҕо сааспар үөрэммитим. Онтон оскуоланы бүтэрэн, музыкальнай училищеҕа, салгыы үрдүк үөрэххэ үөрэммитим. Хас биирдии норуокка хомуһу тардарга тус ньымалаах. Ол иһин варган дьикти кэрэ, умсугутуулаах. Онон дьүүллүүр сүбэҕэ сыаналыырыгар олус уустук. Мин сөхпүтүм диэн, манна, Саха сиригэр хомуһу оҥорууга эдэр дьон эмиэ хото ылсара хайҕаллаах эбит.
Башкирияҕа кубыз оҥорооччу бэрт аҕыйах. Тэрээһин П.А. Ойуунускай аатынан Саха академическай тыйаатырыгар буола турара үчүгэй. Биллиилээх режиссер Андрей Борисов биһиэхэ өрөспүүбүлүкэбит 100 сылын көрсө «Урал Батыр» диэн эпоспытын туруорбута. Кини саха Олоҥхотун туруорар, Олоҥхо тыйаатырын төрүттээбит диэн истибитим. Ону илэ көрөр баҕам улахан этэ. Саха сирэ миэхэ саҥа доҕоттору билиһиннэрдэ. Холобур, Кыргыстаантан Кутманаалы Султанбеков диэн эдэр киһилиин доҕордостубут, аймахтыы түүрдэр буоллахпыт, — диир Артур Гайсаров.
Жанна ЛЕОНТЬЕВА.