Атырдьах ыйын 22-28 күннэригэр Саха Өрөспүүбүлүкэтин Ил Дарханын Кубога аан бастакытын бүтүн Арассыыйатааҕы Го остуол оонньуутун күрэҕэр ыытыллыаҕа. Билиҥҥитэ 110 киһи оонньууга кыттара биллэр, мантан аҥаара — оҕо-аймах.
Арассыыйа араас куораттарыттан: Казаньтан, Челябинскайтан, Жуковскайтан, Сергиев Посадтан, Новосибирскайтан, Владивостоктан, Магадантан, Хабаровскайтан, Санкт-Петербургтан, Варшаваттан, Москваттан, Дьокуускайтан уо.д.а кыттааччылар Саха сиригэр Дьокуускайга мустуохтара. Маны таһынан күрэххэ икки тас дойдуттан — Польшаттан уонна Казахстантан икки үөрэнээччи кыттара билиннэ.
Күрэхтэһии спортивнай чааһа «Демьян Бедный» теплоходка ыытыллара күүтүллэр. Кыттааччылар Өлүөнэ очуостарыгар тиийэ сылдьыахтара уонна субу кэмҥэ көрдөрүү матчтара тэриллиэхтэрэ.
Круиз кэннэ Дьокуускай куоракка Го оонньууга маастар-кылаастар, Арассыыйа биллэр оонньууларын уруоктара, араас маассабай тэрээһиннэр ыытыллыахтара, манна ким баҕалаах кыттыыны ылыаҕа.
Онтон атырдьах ыйын 27-28 күннэригэр Дьокуускайга өссө биир улахан суолталаах тэрээһин Го оонньуу фестивала ыытыллыаҕа. Фестиваль кыттыылаахтара Сахабыт сирин култууратын, үгэстэрин кытары билсиэхтэрэ, маны таһынан кыттааччылары интэриэһинэй бырагыраама: Мега Го, фотозоналар, маастар-кылаастар, остуол оонньуулара, VR зоната, эстрада артыыстара уонна айар кэлэктииптэр кыттыылаах кэнсиэр күүтэр. Креативнай былаһааккаҕа граффити уруһуйдуурга, ролик оҥорорго, саҥа технологиялары баһылыырга үөрэниэхтэрэ.
Санатан этэр эбит буоллахха, 2021 сыллаахха Владивосток куоракка аан дойдутааҕы чемпионат 41 төгүлүн ыытыллыбыта. Бу сүдү улахан күрэхтэһиигэ национальнай чемпионнар 57 дойдуттан кыттыыны ылбыттара. Онон быйылгы оонньуулар тэрээһиннэрэ мантан итэҕэһэ суох, үрдүк көрдөрүүлээх ыытыллаллара саарбаҕа суох.
Го – бу императордар уонна полководецтар оонньуулара. История кэрэһэлииринэн, Го саамай былыргы үйэлэр саҕанааҕы стратегическай оонньуу быһыытынан биллэр. Холобур, Кытайга кинини вэйци, онтон Кореяҕа – бадук диэн ааттыыллар. Го дьоппуоннууттан толору тылбааһа – «тааһынан төгүрүй» диэн суолталанар.
Оонньуу сүрүн быраабылата – куотуһааччыҥ кыраныыссатын төгүрүйэн бэйэҥ судаарыстыбаҥ иэнин кэҥэтээһиҥҥэ сытар. Урут Го оонньуу быраабылатынан Илин дойду ыраахтааҕылара дойдуну салайар стратегияларын булаллара уонна үөрэтэллэрэ.
Оонньуу хойукку диэри Илин Азия эрэ дойдуларыгар тарҕаммыт буоллаҕына, XX үйэ саҥатыгар Арҕаа дойдуларга сыыйа-баайа киэҥник биллэн барбыта. Билиҥҥитэ Го аан дойдуга саамай биллэр оонньуу буолар, 60 мөл. тахса киһи бу остуол оонньуутунан дьарыктанар.
Быйылгы Го оонньуулар сүрүн спонсордарынан «Полиметалл» көмүс хостуур хампаанньа, «Росатом» госкорпорация, «Алмаасэргиэнбаан», Үүнэр көлүөнэ целевой пуонда буолаллар.
Ил Дархан Го оонньууга Кубогын туһунан сиһилии бу сигэнэн киирэн көр: www.гоякутия.рф
keskil14.ru