Арассыыйаҕа Быһааччы күнүн көрсө ахсынньы 26 күнүгэр Дьокуускай куоракка РФ Федеральнай Мунньаҕын «Хорсун быһыытын иһин» өйдөбүнньүк мэтээллэринэн дьону быыһаабыт дьоруой оҕолору наҕараадалаатылар.
«Дьоруой оҕолор» диэн Бүтүн Россиятааҕы гражданскай-патриотическай бырайыак оҕолор хорсун быһыыларын, патриотизмнарын 2014 сылтан өйүүр. 2025 сылга бырайыак чэрчитинэн Саха сириттэн 11 хорсун быһыыны көрдөрбүт оҕолор наҕараадаланнылар, үтүө холобурдарынан дьон-сэргэ хайҕабылын уонна махталын ыллылар.
Наҕараадалары баһаарга, уу объектарыгар дьону быыһыырга геройдуу быһыылары оҥорбут, ону таһынан ыксаллаах быһыыга-майгыга хорсун быһаарыыны көрдөрбүт оҕолор ыллылар:
- Киселева Эвелина, А.Г. Чикачев аатынан Чокурдаах орто оскуолатын 11 кылааһын үөрэнээччитэ, Аллайыаха улууһа;
- Садовников Айхал, Чокурдаах орто оскуолатын 7 кылааһын үөрэнээччитэ, Аллайыаха улууһа, — киһини олорор дьиэтиттэн баһаар кэмигэр быыһыырыгар көрдөрбүт хорсун быһыытын иһин
- Барахов Роман, М.Корнилов аатынан 2 Нөөрүктээйи орто оскуолатын 8 кылааһын үөрэнээччитэ, Өлүөхүмэ улууһа , — дьону ууттан быыһыырыгар көрдөрбүт хорсун быһыытын иһин
- Овчинников Артем, Битиим орто оскуолатын 9 кылааһын үөрэнээччитэ, Ленскэй улууһа, —баһаар кэмигэр дьону быыһыырыгар көрдөрбүт хорсун быһыытын иһин;
- Гордеев Богдан, Битиим орто оскуолатын 8 кылааһын үөрэнээччитэ, Ленскэй улууһа, — баһаар кэмигэр дьону быыһыырыгар көрдөрбүт хорсун быһыытын иһин.
Эдэр дьоруойдарга наҕараадалары «Россия Ийэлэрэ» Бүтүн россиятааҕы общественнай хамсааһын Саха сиринээҕи региональнай отделениетын аатыттан Региональнай сэбиэт чилиэнэ Анна Афанасьевна Соловьева туттарда.
Саха республикатын территориятыгар «Дьоруой оҕолор» бырайыагы олоххо киллэрии эдэр ыччакка гражданскай эппиэтинэһи, бэйэ-бэйэҕэ көмөлөһүүнү, уустук олох-дьаһах түгэннэригэр көмөҕө кэлэргэ бэлэм буолууну үөскэтэргэ көмөлөһөр. Үүнэн иһэр көлүөнэҕэ патриотическай санааны киллэрэргэ улахан суолталаах бырайыак.
keskil14.ru