Өрөспүүбүлүкэ оскуолалара хапытаалынай өрөмүөннээһин федеральнай бырагыраама кыттыылаахтарын испииһэгэр киирдилэр. Манна 4,14 миллиард солк. суумалаах бүддьүөт кирэдьииттэрин биэриэхтэрэ. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.
Дойду бэрэсидьиэнэ Владимир Путин сорудаҕынан чугастааҕы биэс сылга оскуолалары хапытаалынай өрөмүөннээһин бырагыраамата бэлэмнэннэ. Россия вице-премьерэ Марат Хуснуллин бэлиэтээбитинэн, 2026 сылга диэри Арассыыйаҕа 7 300 оскуола өрөмүөннэниэҕэ, онно барыта 2,5 мөлүйүөн оҕо үөрэнэр.
«Бырагыраамаҕа киириэхтээх эбийиэктэргэ сайаапкалары биэрии болдьоҕун федеральнай киин номнуо быһаарбыта», — СӨ Бырабыыталыстыба бэрэссэдээтэлин бастакы солбуйааччы Кирилл Бычков бэлиэтээтэ.
Оскуолалар федеральнай бырагыраама чэрчитинэн өрөмүөнү таһынан, ис туругун тупсарыахтара уонна хаачыстыбалаах үөрэххэ аныгы тэриллэринэн хааччыллыахтара диэн бэлиэтииллэр.
Бу бырагыраама оскуолаҕа техническэй өрөмүөнү таһынан, саҥа көмпүүтэрдэри, спорка аналлаах дьарыктанар тэриллэри, инбэлиит оҕолору үөрэтэр усулуобуйаны тэрийиэҕэ уо.д.а үөрэх эйгэтин таһаарыылаахтык тупсарыахтара диэн «Сириус» киин салайааччыта Елена Шмелева быһаарда.