«Энергетик» лааҕырга төрүччүбүтүн үөрэтэ сылдьар оҕолорго биир күн «Саха сирэ — дьоруойдар дойдулара» кадровай бырагыраама кыттыылааҕа Эдуард Егорович Филиппов ыалдьыттаабыта. Кинини кытары инновация Министерствотыттан Ньургун Стручков кэлбитэ.
Эдуард Егорович Филиппов анал байыаннай дьайыы кыттыылааҕа, Сунтаар сэлиэнньэтин баһылыга. Биир сыл бу бырагыраамаҕа стажировка ааһан үөрэниэхтээх.
Кини оҕо сааһыгар спордунан умсугуйан туран дьарыктаммыт. Ордук кик-боксинг көрүҥүнэн. Тренерэ Анатолий Иванович Афанасьев эбит. Эдуард Егорович сайын аайы спортивнай лааҕырга сылдьыбытын, спорт киниэхэ туох суолталааҕын кэпсээтэ.
Кэлин кини спортан тэйэн ыччаты кытары үлэлиир буолбут. Билигин Сунтаар сэлиэнньэтин баһылыга. 2024 сылга баҕа өттүнэн «Боотур» этэрээккэ киирэн, анал байыаннай дьайыыга барбыта.
Билигин Эдуард Егорович төрөөбүт дойдута сайдарын туһугар үлэлии сылдьар. Оҕолорго «дойдуга таптал төрөөбүт сиргиттэн, төрөппүттэргиттэн, дьиэ кэргэнтэн саҕаланар» уонна «хаһан баҕарар холку, дьон сиэринэн сылдьыҥ, боростуой буолуҥ» диэн эттэ.
Сайдам Васильев,
Ньурба техлиссиэйин 6 кылааһын үөрэнээччитэ, Ньурба улууһа.