Тохсунньу 16 күнүн Саха Өрөспүүбүлүкэтин Ил Дархана Айсен Николаев 2025 сыл ахсынньы 23 күнүнээҕи 801 №-дээх ыйааҕынан Былатыан Ойуунускай аатынан Саха академическай тыйаатыра төрүттэммит күнүнэн биллэрбитэ. Онтон бүгүн Саха тыйаатырын 120 сыллаах үбүлүөйдээх дьыла Арассыыйаҕа биллэриллибит Норуоттар сомоҕолоһууларын, Саха Өрөспүүбүлүкэтигэр Култуура сылларыгар бэлиэтэнэрэ бу дьоро күн суолтатын үс бүк төгүл үрдэттэ.
Бу дьоро киэһэ Саха тыйаатырын уораҕайыгар култуура тэрилтэлэрин быыстапкалара, Саха тыйаатыра 120 сылыгар анаммыт быыстапка-көрдөрүү СӨ Филармониятын тыыннаах доҕуһуолугар дьон-сэргэ көрдөрүүтүгэр турдулар.
Саха тыйаатырын устуоруйатыттан
Саха тыйаатыра Дьокуускайдааҕы Троицкай кафедральнай Собуорга дьиэлэниэҕиттэн сайдыы суолугар үктэммитэ, идэтийбит каадырдары бэлэмнээһиҥҥэ болҕомтотун уурбута. Бастакы идэтийбит режиссердар, худуоһунньуктар, артыыстар кэлбиттэрэ. Алампа Соппуруонап, Өксөкүлээх Өлөксөй, Былатыан Ойуунускай, Николай Неустроев, Суорун Омоллоон, Иван Гоголев, Амма Аччыгыйын айымньылара оонньоммуттара. Өлбөт-сүппэт ааттаах чулуу дьоммут айымньылаахтык үлэлээн, саха театральнай искусствотын историятыгар бэйэлэрин ытык ааттарын көмүс буукубанан суруйан хаалларбыттара.
Опера уонна балет тыйаатырын дьиэтигэр Саха тыйаатыра үлэтин «Үс саха төрүөҕэр» испэктээкилинэн саҕалаабыта. Былатыан Ойуунускай уобараһын аан маҥнай сыанаҕа көрдөрбүтэ.
Тыйаатыр бу кэрдиис кэмэ аан дойду ааннарын арыйбыта, Америка, Европа, Азия, Сэбиэскэй Сойуус усталаах туоратыгар гостуруоллаабыта, театральнай бэстибээллэргэ кыттыбыта. ССРС, Арассыыйа судаарыстыбаннай бириэмийэтин ылбыта, академическай тыйаатыр үрдүк аатын сүкпүтэ.
21-с үйэ кирбиитигэр Бастакы Бэрэсидьиэммит Михаил Ефимович Николаев тустаах уурааҕы таһааран, Дьокуускай куорат килбэйэр киинигэр Саха академическай тыйаатыра саҥа дьиэҕэ киирбитэ уонна аан дойду таһымнаах театр буолбута.
Саха тыйаатыра түөрт төгүл Арассыыйа тыйаатырдарын «Кыһыл көмүс мааска» национальнай бириэмийэтин лауреатынан ааттаммыта.
Үөрүүлээх чааска үрдүк сыанаттан Ө Бырабыытылыстыбатын Бэрэссэдээтэлин солбуйааччыта Сергей Местников бар дьоҥҥо туһаайан эттэ:
— Култуура сыла хас биирдии киһиэхэ кини ис туругун кытары ситимнээх уонна бу биллэриллибит сыл култуура эйгэтин үлэһиттэригэр эрэ диэн буолбакка, хас биирдии Саха сирин олохтооҕо култуура ис туругун арыйан бэйэтигэр ылынар, бэйэтин байытар, ис кыаҕын бөҕөргөтөр кыаҕы биэрэр.
Иккиһинэн, Култуура сылыгар бүтүн норуот үйэлэри уҥуордаан кэлбит сүдү баайын биһиги бөҕөргөтөр, сайыннарар, байытар уонна үүнэр көлүөнэҕэ тириэрдэр соруктаахпыт. Онно анаммыт тэрээһиннэри биһиги быйыл сыл устата ыытыахпыт. Өрөспүүбүлүкэбит төрүт култууратын, үгэстэрин, Ийэ тылы бөҕөргөтөр уонна киэҥ эйгэҕэ таһаарар аналлаах тэрээһиннэр ыытыллыахтара.
Тохсунньу 16 күнүн Ил Дархан анал ыйааҕынан Саха тыйаатыра төрүттэммит күнүнэн олохтообута. Бу быһаарыы дириҥ ис суолталаах, тоҕо диэтэр өр кэмҥэ күн-дьыл быһаарыллыбакка, мөккүөргэ, дьүүллэһиигэ сылдьыбыта, ол эрэн олус сөптөөх быһаарыынан биһиги ытык киһибит Александр Николаевич Жирков көҕүлээһининэн, быһаччы туруорсуутунан уонна чинчийиитигэр олоҕуран бу күн Ил Дархан Айсен Сергеевич ыйааҕынан Саха тыйаатыра төрүттэммит күнүнэн биллэрилиннэ.
Күлүмнүүр көтөхпүт тылыттан кыым саҕан, Алампа алгыһынан арыллыбыт, Өксөкүлээх аман өһүнэн саҕаланан, Ойуунускай уоттаах айымньыларынан тыыннаммыт, Неустроев, Суорун Омоллоон, Иван Гоголев драмаларынан өрө көтөҕүллэн олоҥхо оһуордаах тылыттан силис тардан тахсыбыт Былатыан Ойуунускай аатынан Саха академическай театра 120-с үбүлүөйдээх дьылыгар үктэннэ.
Сахабыт сиригэр Култуура сыла биллэрилиннэ!
Сиһилии видеорепортажка көрүҥ:
Эдкордар: Алена ЛУГИНОВА, Кустуур орто оскуолатын 8 кылааһын үөрэнээччитэ.
Настя МАКАРОВА, Кустуур орто оскуолатын 6 кылааһын үөрэнээччитэ.
«Биракчаан» медиа-киин, Эбээн Бытантай национальнай улууһа.
keskil14.ru