Айар куттаах дьон дойдута ураты тыыннаах, күүстээх дииллэрин истэр, ааҕар эрэ буоллахпытына, бу сырыыга бэйэбит эппитинэн-хааммытынан чахчы оннук буоларын биллибит. Суолбут кэҥиир, иэйиибит күүһүрэр, үлэбит тупсар, санаа күүрэр курдуга.
Ол курдук, саха норуодунай суруйааччылара ини-бии Семен, Софрон Даниловтар үбүлүөйдээх сылларыгар аналлаах тэрээһиҥҥэ кинилэр дойдуларыгар, Горнай улууһугар, баран кэллибит. Бастаан кинилэр ааттарын сүгэр, Бэрдьигэстээххэ, Духуобунас киинигэр «Ааҕыы-билии-көрүү-сир түннүгэ» куонкурус түмүгүн таһааран наҕараадалааһын буолла. Бэртээхэй быыстапка бэлэмнэммит этэ.
Ону таһынан кыайыылаахтар, Дьокуускай куорат 17, 31 №-дээх оскуолалар үөрэнээччилэрэ, ырыа-тойук аргыстаах, хомоҕой хоһоон кэһиилээх кэлбиттэрэ тэрээһини киэргэттэ.
А.Н. Осипов аатынан Бэрдьигэстээх орто оскуолатын 3-а кылааһын үөрэнээччилэрэ икки хамаандаҕа арахсан Дьокуускай куорат 17 уонна 31 нүөмэрдээх оскуола оҕолорун кытары ‘Тобулҕан» викторинаҕа күөн көрүстүлэр, эйэ-дэмнээхтик оонньоотулар, билистилэр.
Учууталлар бэйэ-бэйэлэрин эҕэрдэлэһэллэрин, махтаналларын көрөн, оскуолаларынан үтүө даҕаны ситим тахсыбыт диэн үөрэ көрбүтүм.
Эрэдээктэрбит Татьяна Ильинична Жиркова эҕэрдэ тыллаах «Чуораанчык»,»Колокольчик+» сурунааллары, «Кэскил» хаһыаты уонна минньигэс бэлэхтэри туттарда. Салгыы Семен, Сфорон Даниловтар дойдуларыгар Мытаахха айаннаатыбыт. Музей-галерея салайааччыта Артур Николаевич Егоров суруйааччылар олохторун, айар үлэлэрин, дьиэ кэргэттэрин туһунан араас чахчылары, ахтыылары кэпсээтэ.
ССРС норуодунай худуоһунньуга Афанасий Николаевич Осипов галереятын көрдүбүт. Бу экскурсия туһунан 31 нүөмэрдээх оскуола 4-а кылаас үөрэнээччитэ Георгий Аргунов маннык санаатын үллэстэр:
— Музейга проигрыватель нөҥүө Софрон Петрович Данилов куолаһын иһиттибит. Уонна Афанасий Осипов галереятыгар «Гималаи — крыша мира» хартыынаны сөбүлээтим. Бу хартыына ураты эбит. Кини иннигэр илиигин ууннаххына, көстүбэт күүс, сылаас кэлэр курдук. Экскурсовод кэпсээбитинэн, кырдьык, Эдьиий Дора эмиэ хартыына ураты энергетикалааҕын бигэргэппит.
Бу тэрээһин Н.Е.Мординов-Амма Аччыгыйа аатынан «Кэскил» оҕо бэчээтин кыһата уонна 31 №-дээх оскуола биир улахан бырайыагынан буолар. Ситим салҕанарыгар баҕарабыт.
Туох баар тэрийээччилэргэ, Жиркова Татьяна Ильиничнаҕа, 31-с оскуола учууталларыгар Сивцева Марина Валерьевнаҕа, Андреева Зинаида Егоровнаҕа, Спиридонова Евдокия Николаевнаҕа, Лаппарова Айталина Лазаревнаҕа уонна Семен, Софрон Даниловтар ааттарынан Духуобунас киинин үлэһиттэригэр Айна Владимировнаҕа уонна Айталина Владимировнаҕа барҕа махталбытын тиэрдэбит!
Эльдар САДОВНИКОВ.