Өссө кыһын «Сосновый бор» лааҕырга агро сменаҕа сылдьаммыт джем оҥорор бырайыакпытын толкуйдаабыппыт. Салгыы «Развитие моей малой Родины» стратегическай дьыалабыай оонньуу улуустааҕы түһүмэҕэр кыттыбыппыт. Ол түмүгэр улуус хамаандатыгар киирбиппит. Бүгүн, муус устар 7 күнүгэр бары бииргэ хомуллан, Намтан оптуобуһунан айаннаан Дьокуускай куоракка кэлэммит өрөспүүбүлүкэтээҕи түһүмэххэ кыттыыны ыллыбыт.
Барыта тоҕус улуустан 77 оҕо кэлбит. Саамай үөрүүлээҕэ диэн биһиэхэ барыбытыгар «Сосновый бор» лааҕырга ыам ыйыгар сынньана кэлэр путевканы туттардылар.
Манна кыттыыны ылыахпыт иннинэ хас да күн бэлэмнэммиппит. Бу сылдьан элбэх оҕону кытта билистибит. Саҥа уопут ыллыбыт. Биһиэхэ барыта, сонун, дьикти буолла.
Күн бастакы аҥарыгар бырайыакпытын билиһиннэрдибит. Биһиги «Саха аһа» диэн бородууксуйаны оҥорон таһаарарбыт туһунан сиһилии кэпсээтибит.
Салгыы автобуһунан Ил Түмэн Государственнай Мунньах дьиэтигэр айаннаатыбыт. Манна биһиэхэ Саха сирин парламенын музейыгар экскурсия ыыттылар. Саха өрөспүүбүлүкэтин автономиятын олохтонуутун, бастакы төрүттээччилэрин туһунан сиһилии кэпсээтилэр, ол иһигэр Мыымах туһунан иһиттибит. Саха сирин автономиятын олохтоспут биир дойдулаахпыт Максим Кирович Аммосов туһунан өссө үчүгэйдик биллибит.
Музейга мин (Айыына Протодьяконова) абаҕам депутат, Ил Түмэн IV Ыҥырыылаах Мунньаҕын бэрэссэдээтэлэ Виталий Николаевич Басыгысов портретын киэн тутта көрдүм.
Парламент музейыгар Нам улууһуттан төрүттээх Ил Түмэн депутаттара Егор Ларионов, Ньургун Тимофеев, Алексей Еремеев портреттарын көрдүбүт.
Ил Түмэн депутата Тихон Николаевич Скрябины кытта көрүстүбүт. Ил Түмэн мунньахтыыр саалатыгар сырыттыбыт.
Самира ОСИПОВА, Айыына ПРОТОДЬЯКОНОВА,
Х кылаас, Модут орто оскуолата, Нам