Саха Өрөспүүбүлүкэтин үөрэнээччилэрин Сайыҥҥы спартакиадаларын чэрчитинэн ыытыллар саахымат күрэҕин кыайыылаахтара билиннилэр. 15-тэриттэн алын саастаах оҕолор өй-санаа, эт-хаан күүһүн көрдөрөр саахымат остуолугар оонньоотулар. Күрэхтэһии түмүгүнэн миэстэлэспит оҕолор кубок, мэтээл, Эҕэрдэ сурук уонна бириис туттулар.
I миэстэ — Дьокуускай куорат:
~ Альберт Постников
~ Артур Васильев
~ Сайаана Аргунова
~ Валерия Слепцова
II миэстэ — Бүлүү улууһа:
~ Михаил Алексеев
~ Сарыал Васильев
~ Алгыстаана Шумилова
~ Сайаара Катанова
III миэстэ — Уус Алдан улууһа:
~ Денис Новгородов
~ Уйгун Портнягин
~ Инесса Бочкарева
~ Сайаана Макеева
Күрэхтэһии кылаабынай судьуйата Гаврил Петрович Винокуров бэйэтин санаатын үллэһиннэ: «Үс күннээх саахымат күрэҕэ үрдүк тэрээһиннээхтик ааста. Дьокуускай хамаандата эрэллээхтик кыайда. Иккис миэстэни соһуччу Бүлүү хамаандата ылла. Тренердэр да, сылыктаан көрөр да дьон соһуйдулар. Оҕолор бэйэлэрин санааларын түмэн, хамаанданан оонньуу сылдьан улуустарын, дьоннорун көмүскээтилэр. Үһүс миэстэни спортивнай оскуолалаах Уус Алдан хамаандата сүктэ. Хамаанда оҕолоро үгүс элбэх күрэхтэһиигэ кыттан, сатабылларын көрдөрдүлэр.
Саахымат көрүҥэр хоту улуустартар кэлэн күрэхтэстилэр: Үөһээ Халыма, Өлөөн, Кэбээйи, Булуҥ. Хас биирдии оҕо аҕыйах күн иһигэр күүстээх түгэннэри, мүччүргэннээх быһыылары, хаамыылары көрдүлэр уонна астынан, киэн туттан бардылар. Кыттааччылар олус үчүгэйдик санааларын үллэстибиттэрэ, бэйэ-бэйэлэрин кытта билсиспиттэрэ уонна чопчу бэлэмнээхтэрин билбиттэрэ, кыахтарын-күүстэрин холонон көрбүттэрэ улахан суолталаах«.
Анна Степанова, Гаврил Прокопьев
«Кэскил» медиа-оскуола юнкордара, Төҥүлү, Мэҥэ Хаҥалас