Олунньу 17 күнүгэр Саха сиригэр Пионерия төрүттэммитэ 100 сылын туолар үөрүүлээх күнэ. Бу бэлиэ күнү көрсө олохтоох оскуола уонна Томпотоо5у модельнай библиотека ( дириэктэр Колодезникова Е .Г.) «Кытыастар кыымнаах, төлөннөөх сүрэхтээх оҕо сааспыт кэмнэрэ» диэн ааттаах тэрээһини үөрүүлээх быһыыга-майгыга ыыттылар. Күүтүүлээх күҥҥэ анаан-минээн , ох курдук оҥостон пионер буола сылдьыбыт аҕа саастаах күндү дьоммут ыалдьыттаатылар.
Аалай кыһыл хаалтыс, дохсун тыастаах барабаан, сборга ыҥырар горн – сэбиэскэй кэмнээҕи пионерия арахсыспат аргыстара . Пионер үрдүк аатын сүгүү улахан эппиэтинэс уонна үөрүү, киэн туттуу этэ. Оччотооҕу кутаа уоттаах, ырыа-тойук аргыстаах, «Зарница»оонньуулаах, тимуровскай хамсааһыннаах, үөрэҕи, үлэни тэҥҥэ туппут, сүүрбүт-көппүт көхтөөх оҕо саастарын санатан мустубут дьону олус долгутта. Тэрээһини иилээн-саҕалаан ыытта Томпотооҕу модельнай библиотека үлэһитэ Александра Дмитриевна Ефимова.
Мустубут ыалдьыттары оскуола директора Зинаида Николаевна Пугачева эҕэрдэлээтэ . Урукку кэми ахтан-санаан аастылар Булдакова Лариса Гаврильевна , Варламова Ирина Петровна, пионер баһаатайынан үлэлээбит Сырдык Айалхаана Баай уонна Охлопкова Ольга Степановна Сэбиэскэй кэм оҕото буоламмыт, өктөбүрүөнэк, пионер, хомсомуол, баартыйа ииппит дьоллоох дьонобут диэн ис сүрэхтэриттэн үөрэн, астынан туран, санааларын үллэһиннилэр.
Дириэктэри иитэр үлэҕэ солбуйааччы Сардана Константиновна Сидорова билигин үлэлии-хамныы сылдьар оҕо холбоһугун үлэтин сырдатта. Бүгүн бу суолталаах тэрээһин өрөспүүбүлүкэ бары оскуолаларыгар, оҕо уопсастабаннай тэрилтэлэрэ ылсан үлэлии сылдьаллар диэн бэлиэтээтэ.
Тэрээһиҥҥэ кэлбит ыалдьыттар икки этэрээккэ арахсан толкуйдатар, сыыдамнык туттар-хаптар оонньууларга кыттан бириэмэни билбэккэ аһардылар. Оҕо сааһы санаан, пионерскай ырыалары ыллаан, речевка , девиз этэн ол кэмнэрин санаатылар.
Пионерия 100 сылынан аалай хаалтыһы моонньугар киэн тутта бааммыт аҕа көлүөнэ дьону эҕэрдэлиибит! Өрүү бу курдук эдэр көлүөнэ учууталларга, оҕолорго сүбэ-ама буола сылдьаргытыгар, куруук көмө-тирэх буоларгытыгар махтанабыт! Эһиэхэ олоххо уҕараабат тапталы, эдэрдии эрчими, кытаанах доруобуйаны баҕарабыт!
Олохтоох библиотека коллектывыгар, чуолаан дириэктэргэ Елена Гаврильевнаҕа, Александра Дмитриевнаҕа махталбытын тиэрдэбит!
Саһыл оскуолатын оҕо пресс-киинэ