Өксөкүлээх Өлөксөй «Оттоку олук алгыһа» диэн айымньытын хаста да аахтым. Бу айымньы өйү-санааны ыраастыыр, чэбдигирдэр, күүс-уох биэрэр күүстээх. Онон саҥа үүммүт 2026 сылы Өксөкүлээх Өлөксөй айымньытынан арыйдым диэн этиэхпин сөп.
Бу айымньыга киһи олоҕун, аналын философията, дириҥ өйдөбүлэ суруллубут. Бу алгыс киһи сир ийэтиттэн саҕаланар ситимэ хаһан да быстыбатын, көлүөнэлэр удьуор тыын утумун салгыы илдьэ сылдьалларын, айылҕаҕа сиэрдээх сыһыаны уонна кэлэр кэскилгэ үтүө тыын тардыһыыны бигэргэтэр.
Саха уус-уран литературатын төрүттээччи, тыл үөрэҕин муҥутаан баһылаабыт Өксөкүлээх Өлөксөй бу алгыска тыл күүһүн, өй дьириҥин толору арыйар. Айымньы кэнчээри ыччаты олоххо тирэх буоларга, дьиэ кэргэн сылааһын харыстыырга, удьуор сиэрин утумнаахтык толорорго ыҥырар.
Сиэр-туом иччилээх үөрэҕэр майгынныыр үөрүүлээх, үрдүк дьүрүскэн тылы туһанар. Өбүгэлэрбит удьуор тыыныгар иҥэн, чөл туругу, ыраас дууһаны, дьоллоох олоҕу уонна саҥа көлүөнэлэри кэҥэтиини, куһаҕан тыынтан харыстаныыны баҕарар. Бу баҕалар олох күүһүн бигэргэтэн, инникигэ эрэли уһугуннараллар.
Аристарх ЛУКИН, Х кылаас,
С.Д. Флегонтов аатынан Хадаар орто оскуолата, Чурапчы