Атырдьах ыйын 24 күнүгэр, Таатта улууһун Ытык Күөл нэһилиэгэр, «Сатабыл» оҕо айымньытын дьиэтигэр «Робототехника» диэн саҥа кабинет арыллыытыгар сырыттым. Бу кабинекка Федеральнай бырайыак көмөтүнэн робот оҥорор саҥа тэриллэр кэлбиттэр.
Айсен уонна Вадим бу куруһуокка 7-с сылларын дьарыктаналлар эбит. Кинилэр элбэх куонкурустарга кыттан кыайыылаах тахсыбыттар. Саҥа кабинет арыллыбытыттан, кэҥээбититтэн олус үөрбүттэр уонна астыммыттар: «Өссө атын саҥа моделлары айар, оҥорор кыахтаммыппыт» диэн кэпсээтилэр. Айсен куруһуок саҥа тэрилинэн төбөтүн хамсатар ыт оҥорон, ыалдьыттары соһутта.
Бу үөрүүлээх түгэҥҥэ улуус баһылыгын солбуйааччы А.Г.Гуляева, Үөрэх салалтатыттан Т.А.Тютрина уонна төрөппүттэр «Сатабыл» учууталларын уонна иитиллээччилэрин эҕэрдэлээтилэр.
«Сатабыл» дириэктэрэ Алгыстаана Сырдык-Ай оҕолору ситиһиилэринэн эҕэрдэлээтэ уонна бэлэх туттарда.
Мустубут дьон «Сатабыл» учууталларыгар ситиһиини баҕардылар. Түмүгэр олус минньигэс бырааһынньык тордун сиэтибит. Мин, Айсен уонна Вадим курдук, робот оҥоро үөрэниэхпин баҕардым, куруһуокка суруйтарыам диэн санаа киирдэ.
Влад Портнягин,
«Сатабыл» медиа-студия чилиэнэ,
Таатта.